سوہاوہ/ڈومیلی: سوہاوہ کے نواحی علاقے ڈومیلی میں ایک مسیحی نوجوان وقاص مسیح نے اسلام قبول کر لیا۔ اسلام قبول کرنے کے بعد انہوں نے اپنا نام محمد وقاص رکھ لیا۔
اسلام قبول کرنے کے بعد محمد وقاص نے خوشی اور اطمینان کا اظہار کرتے ہوئے کہا کہ انہوں نے اپنی مرضی، مکمل شعوری فیصلے اور دلی اطمینان کے ساتھ دینِ اسلام کو اپنایا ہے۔
انہوں نے اللہ تعالیٰ کا شکر ادا کرتے ہوئے کہا کہ وہ دعا کے طلبگار ہیں کہ انہیں اسلام کی تعلیمات پر عمل کرنے اور دینِ حق پر ثابت قدم رہنے کی توفیق عطا ہو۔
اس موقع پر علاقے کی معزز شخصیات اور اہلِ علاقہ بھی موجود تھے، جنہوں نے محمد وقاص کو اسلام قبول کرنے پر مبارکباد پیش کی اور ان کے لیے نیک تمناؤں کا اظہار کیا۔
شرکاء کا کہنا تھا کہ اسلام امن، محبت، رواداری اور بھائی چارے کا دین ہے، جو انسانیت کی فلاح اور باہمی احترام کا درس دیتا ہے۔ انہوں نے نئے مسلمان بھائی کا خیرمقدم کرتے ہوئے ان کے لیے دین و دنیا میں کامیابی اور استقامت کی دعا کی۔
مقامی افراد نے اس موقع پر محمد وقاص کے لیے نیک خواہشات کا اظہار کرتے ہوئے کہا کہ وہ اپنی نئی زندگی کا آغاز اسلامی تعلیمات اور اچھے اخلاق کے ساتھ کریں اور معاشرے میں مثبت کردار ادا کریں۔
