جہلم: موسم سرما شروع ہوتے ہی چائے کا استعمال بڑھ گیا ،نومبر کے دوران ہوٹلوں پر غیر معمولی رش دیکھنے میں آیا۔
تفصیلات کے مطابق موسم سرما کے آغاز کے ساتھ ہی شہر سمیت مضافاتی علاقوں میں قائم ہوٹلوں پر چائے کے عادی افراد کی تعداد میں غیر معمولی اضافہ دیکھنے میں آیا ہے ۔
ہوٹلز مالکان نے اخبار نویسوں سے گفتگو کرتے ہوئے بتایا کہ دن کی تھکن دور کرنے اور گپ شپ لگانے کے لئے شہری ہوٹلوں ، ڈھابوں کا رخ کرتے ہیں ، جہاں وہ چائے کی چسکیاں لے کر لطف اندوز ہوتے ہیں ۔ اس طرح چائے کے عادی افراد موسم کی تبدیلی کا فائدہ اٹھاتے ہوئے اپنے دوستوں کے ہمراہ ہوٹلوں اور ڈھابوں پر محفلیں سجاتے ہیں اور چائے کا استعمال کرکے سردی کو دور بھگاتے دکھائی دیتے ہیں ۔
دوسری جانب شہریوں کا اس حوالے سے کہنا ہے کہ موسم کی تبدیلی اور چائے کی مانگ کو مدنظر رکھتے ہوئے ہوٹل مالکان نے گڑ والی چائے ، ادرک والی چائے ، شکر والی چائے اور چینی والی چائے کے الگ الگ نرخ مقرر کر رکھے ہیں ۔
