سوہاوہ: تھانہ سوہاوہ پولیس نے دو بڑی کارروائیاں کرتے ہوئے جگر گینگ کے سرغنہ سمیت 3 ملزمان کو گرفتار کر کے چوری شدہ موٹر سائیکلیں و جنریٹر برآمد کر لئے۔
تفصیلات کے مطابق جہلم کی تحصیل سوہاوہ میں پولیس نے ایس ایچ او محمد زاہد کی قیادت میں دو اہم اور موثر کارروائیاں کرتے ہوئے مجموعی طور پر 3 ملزمان کو گرفتار کر لیا۔
پہلی کارروائی میں چوری کی متعدد وارداتوں میں ملوث جگر گینگ کے سرغنہ سمیت 2 ملزمان کو گرفتار کیا گیا۔ ملزمان ضلع کے مختلف علاقوں میں چوری کی کئی وارداتوں میں ملوث تھے۔ گرفتار ملزمان کے قبضے سے 3 عدد چوری شدہ موٹر سائیکلیں اور 3 عدد جنریٹر برآمد کیے گئے ہیں۔ برآمد شدہ سامان کی کل مالیت تقریباً 3 لاکھ 70 ہزار روپے بنتی ہے۔
پولیس کا کہنا ہے کہ ملزمان کو ٹھوس شواہد کے ساتھ چالان عدالت کیا جائے گا تاکہ انہیں قرار واقعی سزا دلوائی جا سکے۔
دوسری کارروائی میں تھانہ سوہاوہ پولیس نے ٹریفک قوانین کی خلاف ورزی پر ایک اور ملزم کو گرفتار کیا۔ پولیس کے مطابق ملزم بغیر لائسنس کے ٹرک چلا رہا تھا اور اس طرح قانون شکنی کا مرتکب ہوا۔
اس حوالے سے ڈی پی او جہلم نے واضح کیا کہ ٹریفک قوانین کی خلاف ورزی کسی صورت برداشت نہیں کی جائے گی اور غیر قانونی سرگرمیوں میں ملوث افراد کے خلاف سخت قانونی کارروائی عمل میں لائی جائے گی۔
ڈسٹرکٹ پولیس آفیسر جہلم طارق عزیز سندھو نے کہا کہ شہریوں کو ان کے قیمتی اثاثوں سے محروم کرنے والے ملزمان کسی رعایت کے مستحق نہیں اور ایسے عناصر کے خلاف بلاامتیاز کارروائیاں جاری رہیں گی۔
پولیس حکام کا کہنا ہے کہ عوام کے جان و مال کے تحفظ اور امن و امان کے قیام کے لیے ایسی کارروائیاں آئندہ بھی تسلسل کے ساتھ جاری رہیں گی۔
