جہلم: ضلع جہلم میں گندم کی فصل تقریباً پک کر تیار ہو چکی ہے اور آئندہ چند روز میں کٹائی کا عمل شروع ہونے کا امکان ہے، تاہم حکومت کی جانب سے گندم کی خریداری سے متعلق واضح پالیسی سامنے نہ آنے پر کسانوں میں شدید بے چینی پائی جا رہی ہے۔
کاشتکاروں کا کہنا ہے کہ مہنگی کھاد، بیج، زرعی ادویات اور ڈیزل کی قیمتوں میں اضافے نے پہلے ہی ان کی لاگت میں غیر معمولی اضافہ کر دیا ہے۔ ایسے میں اگر گندم کی مناسب قیمت اور بروقت خریداری کو یقینی نہ بنایا گیا تو انہیں بھاری مالی نقصان کا سامنا کرنا پڑ سکتا ہے۔
کسانوں نے خدشہ ظاہر کیا ہے کہ حکومتی پالیسی میں تاخیر کی صورت میں بیوپاری من مانی قیمتیں مقرر کریں گے، جس سے محنت کا صلہ ملنے کے بجائے نقصان کا اندیشہ ہے۔ انہوں نے حکومت سے مطالبہ کیا ہے کہ فوری طور پر گندم کی امدادی قیمت، خریداری مراکز اور طریقہ کار کا اعلان کیا جائے تاکہ کسانوں کی پریشانی کا ازالہ ہو سکے۔
زرعی ماہرین کے مطابق اگر بروقت پالیسی نہ دی گئی تو اس کے اثرات نہ صرف کسانوں بلکہ ملکی سطح پر گندم کی دستیابی اور قیمتوں پر بھی مرتب ہوں گے، جس سے غذائی صورتحال متاثر ہونے کا خدشہ ہے۔
