جہلم میں انسپکٹر جنرل نیشنل ہائی ویز اینڈ موٹروے پولیس سلطان احمد چوہدری کی خصوصی ہدایات پر اور سیکٹر کمانڈر N-5 نارتھ II جہلم ظفر اقبال ملک کی زیرِ نگرانی موبائل ایجوکیشن یونٹ نے ضلع جہلم اور گردونواح میں پبلک سروس وہیکلز (PSVs) کے لیے جامع روڈ سیفٹی آگاہی مہم کا انعقاد کیا۔
اس مہم کے دوران موبائل ایجوکیشن یونٹ سیکٹر N-5 نارتھ II جہلم نے جنرل بس اسٹینڈ دینہ، جنرل بس اسٹینڈ جہلم، جنرل بس اسٹینڈ کھاریاں، شہزاد ٹریولز سرائے عالمگیر، ڈائیوو ایکسپریس جادہ ٹرمینل، ترقی ٹول پلازہ اور جہلم ٹول پلازہ پر پبلک سروس وہیکلز کے ڈرائیورز، کنڈکٹرز، دیگر اسٹاف اور مسافروں کو جامع اور مؤثر بریفنگ دی۔
بریفنگ کے دوران ڈرائیورز اور وہیکل مالکان کو ہدایت کی گئی کہ تمام پبلک سروس بسوں میں LCD اسکرین کے ذریعے ڈرائیور کی لائیو ویڈیو فوٹیج کی تنصیب کو یقینی بنایا جائے اور یہ نظام ہر صورت فعال رکھا جائے، تاکہ ڈرائیور کے رویے اور ڈرائیونگ کے معیار کی مؤثر نگرانی ممکن ہو سکے۔
اسی طرح مسافروں کو بھی آگاہ کیا گیا کہ دورانِ سفر اگر ڈرائیور کی جانب سے کسی قسم کی غفلت، لاپرواہی، تیز رفتاری یا غنودگی محسوس ہو تو فوری طور پر نیشنل ہائی ویز اینڈ موٹروے پولیس کی ہیلپ لائن 130 پر اطلاع دیں، تاکہ بروقت قانونی کارروائی عمل میں لائی جا سکے۔
موبائل ایجوکیشن یونٹ کی جانب سے ڈرائیورز کو محفوظ ڈرائیونگ، ٹریفک قوانین کی پابندی، دورانِ سفر مکمل توجہ اور مسافروں کی جان و مال کے تحفظ کی اہمیت پر بھی زور دیا گیا، جبکہ مسافروں میں روڈ سیفٹی سے متعلق آگاہی مواد بھی تقسیم کیا گیا۔
