جہلم: کمشنر راولپنڈی ڈویژن انجینئر عامر خٹک اور ڈپٹی کمشنر جہلم میر رضا اوزگن کی ہدایت پر میٹرک کے سالانہ امتحانات میں شفافیت کو یقینی بنانے کیلئے ضلعی انتظامیہ متحرک ہو گئی، مختلف امتحانی مراکز کے اچانک دورے کیے گئے۔
تفصیلات کے مطابق ایڈیشنل ڈپٹی کمشنر ریونیو سنیہ صافی نے گورنمنٹ گریجویٹ کالج جی ٹی روڈ جہلم میں قائم امتحانی مرکز کا دورہ کیا، جہاں انہوں نے لائیو مانیٹرنگ سسٹم، عملے کی حاضری اور پرچوں کی تقسیم کے عمل کا تفصیلی جائزہ لیا۔
انہوں نے کالج انتظامیہ کو ہدایت کی کہ طلبہ کو پرسکون ماحول فراہم کیا جائے اور امتحانی کمروں میں روشنی اور پینے کے صاف پانی کے مناسب انتظامات کو یقینی بنایا جائے۔ انہوں نے امتحانی عملے کو سختی سے ہدایت کی کہ نقل کی روک تھام کیلئے زیرو ٹالرنس پالیسی پر عملدرآمد یقینی بنایا جائے۔
دوسری جانب ڈپٹی کمشنر جہلم کی ہدایت پر ضلع بھر کی تمام تحصیلوں میں اسسٹنٹ کمشنرز نے بھی امتحانی مراکز کا معائنہ کیا۔ اسسٹنٹ کمشنر جہلم آفتاب اشرف، اسسٹنٹ کمشنر سوہاوہ غزالہ اصغر، اسسٹنٹ کمشنر پنڈدادنخان عائشہ شفقت اور اسسٹنٹ کمشنر دینہ تیمور خان نے مختلف امتحانی ہالز کا دورہ کر کے انتظامات کا جائزہ لیا۔
انہوں نے عملے کی حاضری، لائیو مانیٹرنگ سسٹم اور امتحانی پرچوں کی محفوظ ترسیل کے عمل کو چیک کیا اور ہدایت کی کہ امیدواروں کو ہر ممکن سہولت فراہم کی جائے۔
ضلعی انتظامیہ نے واضح کیا کہ امتحانات کی شفافیت پر کوئی سمجھوتہ نہیں کیا جائے گا اور کسی بھی قسم کی غفلت یا غیر قانونی سرگرمی میں ملوث عناصر کے خلاف سخت قانونی کارروائی عمل میں لائی جائے گی۔
