جہلم: پنجاب ایجوکیٹرز ایسوسی ایشن ضلع جہلم کے سینئر وائس پریزیڈنٹ محمد رفیع راجپوت نے جامع سکول جہلم میں منعقدہ اساتذہ میں پروموشن آرڈرز تقسیم کرنے کی پروقار تقریب کے موقع پر ترقی پانے والے مرد و خواتین اساتذہ کو دلی مبارک باد پیش کی۔
انہوں نے EST سے SST اور PST سے EST کے عہدوں پر ترقی پانے والے اساتذہ کو مبارکباد دیتے ہوئے کہا کہ اساتذہ کی ترقی دراصل ان کی محنت، قابلیت اور شعبہ تعلیم کے لیے خدمات کا اعتراف ہے۔
محمد رفیع راجپوت نے کہا کہ اساتذہ کو ترقی ملنے سے نہ صرف ان کے حوصلے بلند ہوتے ہیں بلکہ تعلیمی نظام بھی مزید مضبوط اور مؤثر بنتا ہے۔
انہوں نے ڈسٹرکٹ ایجوکیشن اتھارٹی جہلم، بالخصوص چیف ایگزیکٹو آفیسر ایجوکیشن ڈاکٹر نازیہ شہزادی اور متعلقہ افسران کو اس عمل کو شفاف، منظم اور خوش اسلوبی سے مکمل کرنے پر خراجِ تحسین پیش کیا۔
انہوں نے امید ظاہر کی کہ محکمہ تعلیم آئندہ بھی میرٹ، شفافیت اور اساتذہ کی فلاح کو ترجیح دیتے ہوئے ایسے مثبت اقدامات جاری رکھے گا تاکہ تعلیمی معیار میں مزید بہتری لائی جا سکے۔
