جہلم: مہنگائی کی وجہ سے شہر کے لنڈا بازار میں خریداری کا رجحان نمایاں طور پر کم ہو گیا ہے، جس سے دوکاندار شدید پریشانی کا شکار ہیں۔ موسم میں واضح تبدیلی اور سردی کی لہر کے باوجود بھی خریدار نہ ہونے کے برابر ہیں۔
لنڈا بازار کے دکاندار خادم حسین نے میڈیا سے بات کرتے ہوئے بتایا کہ سردیوں کے آغاز کے ساتھ ہی ہر سال خریداروں کا رش بڑھ جاتا تھا اور بازار میں گرم ملبوسات، جرسیاں، شوز، جیکٹس اور گرم ٹوپیاں کے سٹالز لگ جاتے تھے، جس کے باعث بازار میں چلنا مشکل ہو جاتا تھا۔ تاہم اس سال مہنگائی کے باعث خریداروں کی تعداد غیر متوقع طور پر بہت کم ہو گئی ہے، جس سے دکانداروں میں تشویش پائی جا رہی ہے۔
انہوں نے کہا کہ دکانوں اور ریڑھیوں پر گرم ملبوسات کے سٹالز سجنے کے باوجود خریداروں کی تعداد مایوس کن ہے۔ لنڈا بازار آنے والے افراد کی اکثریت قیمتوں میں اضافے کی وجہ سے کچھ خریدے بغیر واپس لوٹ جاتی ہے۔
خریداروں کا کہنا ہے کہ مہنگائی نے غریب عوام سے لنڈا بازار میں خریداری کی طاقت بھی چھین لی ہے۔
