جہلم: ضلعی انتظامیہ جہلم کے زیرِ اہتمام پنجاب یونیورسٹی جہلم کیمپس میں “کوآرڈینیشن اینڈ انگیجمنٹ آف اسٹوڈنٹس” کے عنوان سے ایک اہم، بامقصد اور فکری سیمینار کا انعقاد کیا گیا۔
سیمینار کا بنیادی مقصد طلبہ کی تعلیمی، سماجی اور اخلاقی تربیت کو مؤثر بناتے ہوئے انہیں ایک ذمہ دار، باشعور اور باخبر شہری بنانا تھا تاکہ نوجوان نسل ملک دشمن عناصر کے منفی پروپیگنڈے کا حصہ نہ بنے اور مثبت کردار ادا کرتے ہوئے روشن مستقبل کی ضمانت بن سکے۔
تقریب کا باقاعدہ آغاز تلاوتِ کلامِ پاک اور نعتِ رسولِ مقبول ﷺ سے کیا گیا۔ سیمینار میں ضلعی انتظامیہ کے افسران، تعلیمی ماہرین، سماجی و مذہبی شخصیات اور طلبہ کی بڑی تعداد نے شرکت کی۔
سیمینار سے خطاب کرتے ہوئے میر رضا اوزگن ڈپٹی کمشنر جہلم نے کہا کہ نوجوان نسل قوم کا سب سے قیمتی اثاثہ ہے اور اس کی فکری و اخلاقی تربیت کے بغیر قومی ترقی ممکن نہیں۔ انہوں نے کہا کہ ایسے سیمینارز طلبہ کو مثبت سوچ، درست سمت اور بروقت رہنمائی فراہم کرتے ہیں، جو انہیں معاشرے کا مفید شہری بنانے میں اہم کردار ادا کرتے ہیں۔
ڈسٹرکٹ آفیسر (سیکنڈری ایجوکیشن) محمد شہزاد نے طلبہ سے براہِ راست مکالمہ کرتے ہوئے ان کے سوالات سنے اور تفصیلی جوابات دیے۔ انہوں نے کہا کہ اسلام اور پاکستان کے دشمن نوجوانوں کو گمراہ کرنے کے لیے مختلف حربے استعمال کرتے ہیں، اس لیے طلبہ کو باشعور، باخبر اور ہوشیار رہنے کی ضرورت ہے۔
اس موقع پر سماجی کارکن عبدالغفور چوہان نے قانون کی پاسداری اور سماجی ذمہ داریوں پر زور دیا، جبکہ ایڈیشنل ڈپٹی کمشنر (جنرل) شگفتہ جبین نے کہا کہ نوجوانوں کی کردار سازی دراصل قوم کی تعمیر ہے۔ چیف ایگزیکٹو آفیسر ڈسٹرکٹ ایجوکیشن اتھارٹی نازیہ، اسسٹنٹ کمشنر جہلم عبدالسمیع شیخ، ڈسٹرکٹ آفیسر لٹریسی میمونہ انجم اور ڈپٹی ڈائریکٹر کالجز حمید نے بھی اپنے خیالات کا اظہار کیا۔
صدر پرائیویٹ اسکولز ایسوسی ایشن پروفیسر (ر) شریف ساجد نے کہا کہ طلبہ کی اخلاقی تربیت وقت کی اہم ضرورت ہے اور ایسے پروگرامز مثبت اور تعمیری سوچ کو فروغ دیتے ہیں۔ مذہبی اسکالر عرفان الحق اور ڈسٹرکٹ خطیب قاری عبدالباسط نے نوجوانوں کو دینی و اخلاقی اقدار اپنانے کی تلقین کی۔
جنرل سیکرٹری خیرالناس تنظیم انعام الحق نے کہا کہ نوجوانوں کو فکری طور پر مضبوط بنانا ہی ملک دشمن عناصر کے عزائم کو ناکام بنانے کا مؤثر ذریعہ ہے۔
سیمینار کے اختتام پر طلبہ نے اس پروگرام کو معلوماتی، بروقت اور رہنمائی سے بھرپور قرار دیتے ہوئے ضلعی انتظامیہ اور یونیورسٹی انتظامیہ کی کاوشوں کو سراہا۔
