جہلم کی سرزمین ایک بار پھر قومی کھیل ہاکی کے سنہری لمحوں کی گواہ بنی، جہاں تیسری چیف آف آرمی اسٹاف انٹر کلب نیشنل ہاکی چیمپیئن شپ کا شاندار انعقاد گورنمنٹ ہائی اسکول جہلم کے گراؤنڈ میں کیا گیا۔ قومی سطح کے اس ایونٹ میں ملک بھر سے آٹھ مضبوط ہاکی ٹیموں نے شرکت کی اور اعلیٰ معیار کے کھیل کا مظاہرہ کیا۔
چیمپیئن شپ کا سنسنی خیز فائنل کینٹ ہیرو اور سائپرس ہاکی کلب کے درمیان کھیلا گیا، جس میں کینٹ ہیرو نے بہترین حکمتِ عملی، نظم و ضبط اور شاندار ٹیم ورک کا مظاہرہ کرتے ہوئے دو صفر سے کامیابی حاصل کی اور چیمپیئن شپ کا ٹائٹل اپنے نام کر لیا۔ فائنل میچ میں کھلاڑیوں کی رفتار، مہارت اور جذبے کو شائقینِ ہاکی نے بھرپور داد دی۔
فائنل میچ کے مہمانِ خصوصی اسحاق ڈار (فیڈریشن آف پاکستان چیمبر آف کامرس) تھے، جنہوں نے اپنے خطاب میں کہا کہ “جہاں کھیلوں کے میدان آباد ہوتے ہیں، وہاں کے ہسپتال ویران ہو جاتے ہیں۔ کھیل صحت مند قوم کی بنیاد ہیں۔”
اس موقع پر ممبر کانگریس پنجاب (پی ایچ ایف) ارشد کیانی نے کہا کہ نوجوان نسل کو منفی سرگرمیوں سے بچانے کے لیے کھیلوں کے میدانوں کو آباد کرنا ناگزیر ہے، کیونکہ ایک صحت مند معاشرہ ہی ترقی یافتہ قوم کی پہچان ہوتا ہے۔
تقریب کے اختتام پر چوہدری امتیاز پولی، ارشد کیانی اور نوید صفدر (صدر ڈسٹرکٹ ہاکی ایسوسی ایشن) نے فاتح اور رنر اپ ٹیموں کے کھلاڑیوں میں انعامات تقسیم کیے۔ اس کامیاب ایونٹ کے انعقاد میں گراؤنڈ انچارج طارق محمود اور چوہدری منیب (سیکرٹری ڈسٹرکٹ ہاکی ایسوسی ایشن) نے بھی نمایاں کردار ادا کیا۔
یہ چیمپیئن شپ نہ صرف ہاکی کے فروغ کا باعث بنی بلکہ نوجوانوں میں کھیلوں کے مثبت رجحان کو اجاگر کرنے کا ایک روشن باب بھی ثابت ہوئی۔
