سوہاوہ: بار ایسوسی ایشن سوہاوہ کے سالانہ انتخابات کامیابی سے مکمل ہو گئے، جن میں پروفیشنل گروپ نے شاندار کارکردگی کا مظاہرہ کرتے ہوئے تمام منتخب نشستوں پر کلین سویپ کر لیا۔
انتخابات میں پروفیشنل گروپ اور جناح لائرز فورم کے امیدواروں کے درمیان سخت اور کانٹے دار مقابلہ دیکھنے میں آیا، تاہم پروفیشنل گروپ نے بھاری اکثریت سے کامیابی حاصل کرتے ہوئے اپنے تمام امیدواروں کو کامیاب کروا لیا۔
انتخابی نتائج کے مطابق پروفیشنل گروپ کی جانب سے راجہ ریاست خان صدر، محمد نعمان ہاشمی نائب صدر، انس ثوبان مرزا جنرل سیکرٹری، راجہ فرخ جاوید جوائنٹ سیکرٹری اور راجہ نواز ش علی لائبریری سیکرٹری منتخب ہوئے۔
نو منتخب عہدیداران نے اپنی کامیابی کو وکلاء برادری کے اعتماد کا نتیجہ قرار دیتے ہوئے پروفیشنل گروپ کے تمام وکلاء کا شکریہ ادا کیا۔ بالخصوص سابق صدر بار چوہدری محمد زبیر، راجہ سہیل شفیق، سید شجاعت حسین کاظمی، راجہ جنید اشتیاق، چوہدری شبیر اختر، عاصمہ ہاشمی، خالدہ منیر، راجہ محمد سہیل، ملک عامر سہیل، ناصر محمود کیانی، شیر مسعود اور دیگر تمام ممبران کا فرداً فرداً شکریہ ادا کیا گیا۔
اس موقع پر نو منتخب عہدیداران نے اس عزم کا اظہار کیا کہ وہ بار ایسوسی ایشن سوہاوہ اور وکلاء برادری کی فلاح و بہبود، درپیش مسائل کے حل اور ادارے کی بہتری کے لیے ہر ممکن اقدامات کریں گے اور وکلاء کے اعتماد پر پورا اترنے کے لیے بھرپور محنت جاری رکھیں گے۔
