جہلم میں پولیس نے ہوٹل پر چھاپہ مار کر تین افغانی باشندوں اور ہوٹل کے مالک گرفتار کو کر لیا، ہوٹل کو سیل کر دیا گیا۔
تفصیلات کے مطابق ڈی پی او جہلم طارق عزیز سندھو کی ہدایت پر تھانہ سٹی پولیس جہلم نے اہم کارروائی کرتے ہوئے ریلوے روڈ پر واقع ایک ہوٹل پر چھاپہ مار کر تین افغانی باشندوں اور ہوٹل کے مالک کو گرفتار کر لیا گیا۔
ترجمان جہلم پولیس کے مطابق گرفتار کیے گئے افغانی باشندے وزٹ ویزے پر پاکستان آئے تھے اور غیر قانونی طور پر کاروبار میں مصروف تھے۔
پولیس نے بتایا کہ ہوٹل مالک نے افغانی شہریوں کو پناہ دے رکھی تھی جس پر اس کے خلاف بھی مقدمہ درج کر کے ہوٹل کو سیل کر دیا گیا۔ ترجمان کے مطابق وزٹ ویزے پر کسی بھی غیر ملکی کو کام یا کاروبار کرنے کی اجازت نہیں دی جا سکتی۔
ڈی پی او جہلم طارق عزیز سندھو نے کہا کہ قانون کی خلاف ورزی کرنے والوں کے خلاف سخت کارروائی جاری رہے گی، کسی کے ساتھ ظلم یا ناانصافی برداشت نہیں کی جائے گی، لیکن غیر قانونی رہائش رکھنے والوں کو ضلع جہلم میں قیام کی اجازت نہیں دی جائے گی۔ پولیس نے چاروں ملزمان کے خلاف مقدمہ درج کر کے تفتیش شروع کر دی ہے۔
