جہلم: ضلعی انتظامیہ جہلم کی جانب سے "نگہبان رمضان پیکیج” کے تحت اشیاء کی ترسیل اور نرخوں کی سخت نگرانی کی جا رہی ہے جبکہ چاروں تحصیلوں کے اسسٹنٹ کمشنرز کو پولٹری اور دیگر ضروری اشیاء کے نرخ مستحکم رکھنے کے احکامات جاری کیے گئے ہیں۔
ڈپٹی کمشنر سید محمد میثم عباس نے پرائس کنٹرول مجسٹریٹس کو ہدایت دی ہے کہ رمضان بازاروں اور عام دکانوں میں اشیاء خوردونوش کی قیمتوں میں فرق کو ختم کیا جائے اور ہر سطح پر سرکاری نرخنامے کی پاسداری کو یقینی بنایا جائے۔
ڈپٹی کمشنر کا کہنا تھا کہ مرغی کے گوشت سمیت تمام نوٹیفائیڈ اشیاء مقررہ نرخوں سے زائد قیمت پر فروخت نہیں ہونے دی جائیں گی۔ انہوں نے مزید کہا کہ اشیاء کی ترسیل اور قیمتوں کے تعین میں مڈل مین کے کردار کو مکمل طور پر ختم کیا جائے تاکہ عام شہریوں کو حقیقی ریلیف فراہم کیا جا سکے۔
پرائس کنٹرول مجسٹریٹس کو ناجائز منافع خوروں کے خلاف سخت ایکشن لینے کی ہدایت کی گئی ہے تاکہ عوام کو حکومتی نرخوں کے مطابق اشیاء ضروریہ میسر آ سکیں۔
