جہلم پریس کلب کے صحافیوں نے پیکا ایکٹ پر شدید تشویش کا اظہار کرتے ہوئے نیشنل پریس کلب اسلام آباد اور پاکستان فیڈرل یونین آف جرنلسٹس (PFUJ) کے مؤقف کی مکمل حمایت کا اعلان کیا ہے۔
پریس کلب کے چیئرمین چوہدری عابد محمود، صدر میڈیا ون مرزا قدیر بیگ، صدر ڈسٹرکٹ یونین آف جرنلسٹس چوہدری مہربان حسین اور سرپرست اعلیٰ ڈیجیٹل میڈیا انیس الرحمن بٹ نے اپنے پریس نوٹ میں کہا کہ پیکا ایکٹ آئین پاکستان کی روح کے منافی ہے اور اس کے نفاذ سے صحافت کو شدید نقصان پہنچ رہا ہے۔
صحافیوں کا کہنا ہے کہ پیکا ایکٹ کے ذریعے آزادی اظہار رائے کو دبایا جا رہا ہے اور ملک بھر کے صحافی غیر یقینی صورتحال اور دباؤ کا شکار ہو چکے ہیں۔
صحافیوں نے مطالبہ کیا کہ حکومت اظہار رائے پر قدغنیں ختم کرے اور پیکا ایکٹ جیسے قوانین پر فوری نظرثانی کرے تاکہ صحافی اپنی ذمہ داریاں آزادی اور بغیر خوف کے ادا کر سکیں۔
