دینہ: پولیس نے خواتین کے تحفظ کے حوالے سے ایک اہم کارروائی کرتے ہوئے دینہ میں خواتین کی عفت میں خلل ڈالنے کے الزام میں دو ملزمان کو گرفتار کر لیا۔
تفصیلات کے مطابق جہلم کی تحصیل دینہ میں ایس ایچ او تھانہ منگلا کینٹ اور ان کی ٹیم نے شکایت موصول ہونے پر فوری مقدمہ درج کر کے کارروائی عمل میں لاتے ہوئے دونوں ملزمان کو حراست میں لے لیا۔
پولیس حکام کے مطابق واقعے کی مزید تفتیش جاری ہے اور ملزمان کو ٹھوس شواہد کے ساتھ عدالت میں پیش کیا جائے گا تاکہ انہیں قانون کے مطابق قرار واقعی سزا دلوائی جا سکے۔
ڈسٹرکٹ پولیس آفیسر جہلم شفیق احمد چوہدری نے اس موقع پر واضح کیا کہ عورتوں اور بچوں کے ساتھ زیادتی، ہراسانی اور عفت میں خلل ڈالنے جیسے جرائم میں زیرو ٹالرنس پالیسی پر سختی سے عمل کیا جا رہا ہے۔
انہوں نے کہا کہ خواتین کے تحفظ کو ہر صورت یقینی بنایا جائے گا اور اس نوعیت کے جرائم میں ملوث عناصر کے خلاف بلا امتیاز قانونی کارروائی جاری رہے گی۔
پولیس کا کہنا ہے کہ شہری بلا خوف و خطر ایسے واقعات کی فوری اطلاع دیں تاکہ بروقت کارروائی کر کے معاشرے کو محفوظ بنایا جا سکے۔
