پنڈدادنخان: شہید ہیڈ کانسٹیبل نوازش علی کی اکتیسویں برسی، شہید کی لحد پر پولیس کے چاق و چوبند دستے نے سلامی دی۔
ڈی پی او جہلم ناصر محمود باجوہ کے حکم پر ڈی ایس پی پنڈ دادنخان عامر شاہین گوندل، ایس ایچ او پنڈ دادنخان عثمان تصدق اور دیگر پولیس افسران نے شہید کی لحد پر پھول چڑھائے اور شہید کے درجات کی بلندی کے لیے دعا کی۔
یاد رہے کہ شہید ہیڈ کانسٹیبل نوازش علی31سال قبل ضلع چکوال میں اپنی ڈیوٹی سرانجام دیتے ہوئے شہید ہو گئے تھے۔
اس حوالے سے ڈی پی او جہلم ناصر محمود باجوہ کا کہنا ہے کہ شہداء پولیس ہمارے ماتھے کا جھومر ہیں جن کی عظیم قربانیاں ناقابل فراموش ہیں، شہداء پولیس ہمارے محسن ہیں جو بہادری اور شجاعت کی داستانیں رقم کرتے ہوئے ہمیشہ کے لیے امر ہوگئے۔
انہوں نے کہا کہ شہداء پولیس کی لازوال قربانیوں کا قرض ہم کبھی نہیں اتار سکتے، شہداء کی فیملیز اور بچے مجھے اپنی فیملی اور بچوں کی طرح عزیز ہیں۔
