جہلم: اوورسیز پاکستانی اور جہلم کے معروف سماجی و ترقیاتی رہنما ملک محمد صادق پاکستان پہنچتے ہی عوامی خدمت کے جذبے کے تحت ایک مرتبہ پھر شہر کی ترقی اور عوامی فلاح کے منصوبوں میں مصروفِ عمل ہو گئے۔
ملک محمد صادق نے ضلع کچہری جہلم میں زیبرا کراسنگ کو دوبارہ رنگ کروایا، پودوں کی تراش خراش اور صفائی کے کام کروائے، نالے کی صفائی کا انتظام کیا اور ان تمام سرگرمیوں کی خود سارا دن نگرانی (سپرویژن) کرتے رہے۔ انہوں نے نہ صرف پودوں کو پانی لگوایا بلکہ متعلقہ اداروں کے افسران کو ہدایت کی کہ عوامی سہولت کے لیے یہ ترقیاتی کام بلا تعطل جاری رہیں۔
ملک محمد صادق کا کہنا تھا کہ یہ تمام کام عوام کی فلاح و بہبود کے لیے ہیں اور ان کا مقصد جہلم شہر کو ایک صاف، خوبصورت اور ترقی یافتہ ضلع بنانا ہے۔ وہ کئی سالوں سے بطور اوورسیز پاکستانی، جہلم کے ترقیاتی اور فلاحی منصوبوں میں بھرپور کردار ادا کر رہے ہیں اور روڈ ایکسپرٹ ہونے کی حیثیت سے عوامی سہولت کے لیے متعدد تجاویز بھی دیتے رہے ہیں۔
ملک محمد صادق کی خدمات کے اعتراف میں انہیں ماضی میں ڈسٹرکٹ پولیس آفیسر اور ڈپٹی کمشنر جہلم کی جانب سے ایپریسی ایشن لیٹرز بھی مل چکے ہیں۔ ان کی عملی خدمات کو عوامی سطح پر بھرپور سراہا جاتا ہے اور شہری انہیں ایک محبِ وطن، ایماندار اور فعال شخصیت کے طور پر دیکھتے ہیں۔
جہلم کی عوام نے ان کے عوامی جذبے کو خراجِ تحسین پیش کرتے ہوئے اس امید کا اظہار کیا ہے کہ ملک محمد صادق مستقبل میں سیاست کے میدان میں آ کر بھی عوامی خدمت کا یہ سلسلہ جاری رکھیں گے۔
