جہلم: ڈپٹی کمشنر جہلم میثم عباس نے کہا ہے کہ شہریوں کو تمام بنیادی سہولیات کی فراہمی ضلعی انتظامیہ کی اولین ترجیح ہے، اس مقصد کے لیے نکاسی آب، تجاوزات کے خاتمے اور شہر کی تزئین و آرائش سے متعلق ترقیاتی منصوبوں پر کام تیزی سے جاری ہے۔
ان خیالات کا اظہار انہوں نے جہلم شہر کے تفصیلی دورے کے دوران کیا۔ ڈپٹی کمشنر نے مشین والا سے سلمان پارس تک زیرِ تعمیر نئی سیوریج لائن اور نالوں کی تعمیر کا جائزہ لیا اور جاری کام پر اطمینان کا اظہار کیا۔
دورے کے دوران انہوں نے غلہ منڈی میں تجاوزات کی شکایات پر موقع پر کارروائی کرتے ہوئے میونسپل حکام کو فوری طور پر تمام تجاوزات ختم کرنے کی ہدایت کی۔
انہوں نے اسسٹنٹ کمشنر شمس الرحمٰن اور میونسپل کمیٹی حکام کو سختی سے ہدایت کی کہ ختم کی گئی تجاوزات کو دوبارہ لگانے کی ہرگز اجازت نہ دی جائے اور تمام بازاروں اور ملحقہ گلیوں میں تجاوزات کے خلاف بلاتاخیر کارروائی کی جائے۔
ڈپٹی کمشنر میثم عباس نے مین بازار کا بھی دورہ کیا جہاں سیوریج لائن کی تنصیب کے بعد ٹف ٹائل بچھانے کا کام جاری ہے۔ انہوں نے متعلقہ حکام کو ہدایت کی کہ ٹف ٹائل کا کام جلد از جلد مکمل کیا جائے تاکہ بازار میں معمول کی کاروباری سرگرمیاں بحال ہو سکیں۔
