جہلم: ڈپٹی کمشنر جہلم کی زیر صدارت انسدادِ گداگری مہم کے حوالے سے ایک اہم اجلاس منعقد ہوا، جس میں ضلع بھر میں پیشہ ور گداگری کے خاتمے کے لیے جاری اقدامات اور آئندہ حکمت عملی کا تفصیلی جائزہ لیا گیا۔
اجلاس میں اسسٹنٹ کمشنرز، چیف ایگزیکٹو آفیسر ایجوکیشن، ڈسٹرکٹ پبلک پراسیکیوٹر، محکمہ صحت اور پروبیشن کے افسران، این جی اوز کے نمائندگان، اسسٹنٹ ڈائریکٹرز کمیونٹی ڈویلپمنٹ اور دیگر متعلقہ افسران نے شرکت کی۔ اس موقع پر ڈپٹی ڈائریکٹر سوشل ویلفیئر نے انسدادِ گداگری مہم کے تحت جاری سرگرمیوں اور اقدامات پر تفصیلی بریفنگ دی۔
ڈپٹی کمشنر جہلم نے اجلاس سے خطاب کرتے ہوئے ہدایت کی کہ ضلع بھر میں پیشہ ور بھکاریوں کا مکمل اور منظم ڈیٹا ایک معیاری فارم کے ذریعے تیار کیا جائے۔ انہوں نے کہا کہ اس فارم کی تیاری سوشل ویلفیئر ڈیپارٹمنٹ کرے گا جبکہ اس عمل میں اسسٹنٹ کمشنرز کی نگرانی میں فیلڈ اسٹاف بھرپور معاونت فراہم کرے گا۔
انہوں نے مزید ہدایت کی کہ مستحق اور نادار افراد کی نشاندہی کر کے انہیں تعلیم، صحت اور دیگر بنیادی سہولیات فراہم کی جائیں تاکہ وہ بھیک کے پیشے سے نکل کر باعزت روزگار کی جانب واپس آ سکیں اور معاشرے کا مفید حصہ بن سکیں۔
ڈپٹی کمشنر نے واضح کیا کہ پیشہ ور گداگری نہ صرف معاشرتی نظم و ضبط کو متاثر کرتی ہے بلکہ عوامی مقامات پر شہریوں کے لیے مشکلات کا باعث بھی بنتی ہے، اس لیے پیشہ ور بھکاریوں کے خلاف قانون کے مطابق کارروائی کو ہر صورت یقینی بنایا جائے گا۔
اجلاس کے اختتام پر اس عزم کا اظہار کیا گیا کہ انسدادِ گداگری مہم کو مزید مؤثر، مربوط اور نتیجہ خیز بنایا جائے گا تاکہ ضلع بھر میں پیشہ ور گداگری کے خاتمے اور مستحق افراد کی بحالی کے عمل کو یقینی بنایا جا سکے۔
