جہلم: میاں مظہر حیات نے کہا کہ ایس ایل ایس کالج کو جہلم کا سب سے پرانا تعلیمی ادارہ ہونے کا اعزاز حاصل ہے۔
سی ای او ہیلتھ ڈیپارٹمنٹ جہلم میاں مظہر حیات نے ایس ایل ایس کالج میں آئلز ٹیسٹ سینٹر کے قیام پر منیجنگ ڈائریکٹر ایس ایل ایس کالج سرفراز ملک کو مبارکباد دیتے ہوئے کہا کہ ایس ایل ایس کالج ضلع جہلم میں آئلز کے لیے برٹش کونسل کا واحد گولڈ پارٹنر اور ایوارڈز ہولڈر ادارہ ہے، جو اس کی تعلیمی خدمات، شفاف نظام اور اعلیٰ معیار کا واضح ثبوت ہے۔
ان کا کہنا تھا کہ آئلز ٹیسٹ کی سہولت جہلم میں فراہم ہونے سے طلبہ و طالبات کو اسلام آباد اور لاہور جانے کی زحمت سے نجات مل گئی ہے اور اب وہ اپنے ہی شہر میں بین الاقوامی معیار کے مطابق امتحان دے سکتے ہیں۔
میاں مظہر حیات نے ٹیسٹ ڈے کے موقع پر ایس ایل ایس کالج کا دورہ کیا اور آئلز ٹیسٹ کے دوران اختیار کیے گئے اقدامات، سخت سیکیورٹی، ہائی سیکریسی اور اسلام آباد و لاہور کے مساوی ہائی اسٹینڈرڈ انتظامات کو سراہا۔
انہوں نے مزید کہا کہ وزیراعلیٰ پنجاب مریم نواز کے وژن کے مطابق ضلع جہلم میں عوامی فلاح، صحت اور تعلیم کے شعبوں میں بہتری کے لیے عملی اقدامات کیے جا رہے ہیں۔ انہوں نے امید ظاہر کی کہ ایس ایل ایس کالج مستقبل میں بھی تعلیمی میدان میں نمایاں کردار ادا کرتا رہے گا اور نوجوان نسل کے لیے روشن مواقع پیدا کرے گا۔
