دینہ: وزیر مملکت برائے ریلوے بلال اظہر کیانی نے دینہ جی ٹی روڈ پر 36 لاکھ روپے کی لاگت سے تعمیر ہونے والے چلڈرن پارک کا باقاعدہ افتتاح کر دیا۔
پارک کی تعمیر میونسپل کمیٹی دینہ کے زیر انتظام مکمل کی گئی، جسے مقامی انتظامیہ کی کوششوں اور وزیر اعلیٰ پنجاب مریم نواز شریف کے "ستھرا پنجاب” ویژن کے تحت پایۂ تکمیل تک پہنچایا گیا۔
تقریب میں ڈپٹی کمشنر جہلم میثم عباس، اسسٹنٹ کمشنر دینہ صفاء عابد، سابق ایم پی اے مہر محمد فیاض سمیت دیگر اہم شخصیات نے شرکت کی۔ وفاقی وزیر نے ربن کاٹ کر افتتاح کیا اور پارک میں لگائے گئے جھولوں اور دیگر تفریحی سہولیات کا معائنہ کیا۔
اس موقع پر میڈیا سے گفتگو کرتے ہوئے بلال اظہر کیانی نے کہا کہ وزیر اعلیٰ پنجاب مریم نواز شریف کا وژن ہے کہ صوبے بھر میں صاف ستھرا اور خوبصورت ماحول مہیا کیا جائے، اور دینہ میں اس پارک کا قیام اسی وژن کی عملی مثال ہے۔ انہوں نے کہا کہ ایسے منصوبے عوام کو سہولتیں فراہم کرنے کے ساتھ ساتھ بچوں اور خواتین کو صحت مند سرگرمیوں کے لیے محفوظ ماحول مہیا کرتے ہیں۔
وفاقی وزیر مملکت نے مزید کہا کہ انتظامیہ اپنی ذمہ داریاں بھرپور انداز میں نبھا رہی ہے، اور اب وقت ہے کہ عوام اور سماجی خدمت گزار بھی آگے بڑھ کر اپنا کردار ادا کریں۔ اُنہوں نے کہا کہ "چھوٹے چھوٹے پارکوں سے ہمارے شہر اور ضلع کی مجموعی شکل بدل سکتی ہے، اور ہمیں چاہیے کہ ایسی جگہیں جہاں ممکن ہو، وہاں بھی چھوٹے تفریحی منصوبے شروع کیے جائیں۔”
تقریب میں سابق چیئر مین بلدیہ دینہ شیخ اکرام الہی، میاں سجاد، راجہ جنید کیانی، راجہ ساجد نواز، نوید قریشی، ملک صداقت سمیت شہریوں کی بڑی تعداد نے شرکت کی اور اس منصوبے کو سراہا۔
دنیا کے ہر ترقی یافتہ ملک میں بچوں کے لیے پارکس کے لیے جگہ مختص کی جاتی ہے۔ ہمارا ملک وہ ہے جہاں بنے ہوئے پارکس تباہ کر دیے جاتے ہیں اور اس جگہ پر قبضہ کر لیا جاتا ہے۔
بہرحال یہ ایک احسن اقدام ہے۔ پارکس عوام کی شدید ترین ضرورت ہیں۔