جہلم: پنجاب حکومت نے جہلم کے علاؤہ پنجاب کے 15 سرکاری ہسپتالوں میں فالج کے مریضوں کے لیے فالج کے اثرات انتہائی کم کرنے والا مہنگا ترین ٹیکہ 24 گھنٹے فری دستیاب ہونے کااعلان کردیا۔
اگر کسی شخص کو خدانخواستہ فالج کا اٹیک ہو ، جس میں جسم کا آدھا یا جزوی حصہ مفلوج ہو جائے تو اسے فوراً 4 سے 5 گھنٹوں کے اندر متعلقہ نزدیکی ہسپتال لا کر انجکشن لگوایا جاسکتا ہے۔ اگرTPA انجکشن مریض کو اٹیک ہونے کے 4 سے 5 گھنٹے کے اندر لگ جائے تو اسے ساری عمر کی معذوری سے بچایا جاسکتا ہے۔
ان ہسپتالوں میں سروسز ہسپتال لاہور، میو ہسپتال لاہور، پنجاب انسٹیٹیوٹ آف نیورو سائنسز لاہور، سر گنگارام ہسپتال لاہور، جناح ہسپتال لاہور، الائیڈ ہسپتال فیصل آباد، نشتر ہسپتال ملتان، علامہ اقبال میموریل ٹیچنگ ہسپتال سیالکوٹ، شیخ زید ہسپتال رحیم یار خان، ہولی فیملی ہسپتال راولپنڈی، ڈی ایچ کیو ہسپتال گوجرانوالہ، ڈی ایچ کیو ہسپتال شیخو پورہ، ڈی ایچ کیو ہسپتال قصور، ڈی ایچ کیو ہسپتال نارووال اور وکٹوریہ ہسپتال بہاولپور شامل ہیں۔ فیصل آباد عزیز فاطمہ ہسپتال میں سہولت موجود ہے۔
جہلم کے شہریوں نے مشیر وزیراعلی پنجاب جنرل( ر ) ڈاکٹر اظہر محمود کیانی سے ان اسپتالوں میں سول اسپتال جہلم کو بھی شامل کرنے کامطالبہ کیا ہے۔
