جہلم: ریل گاڑی پر سفر کے دوران ریل کی منفرد آواز اور کوچز کی کھڑکیوں سے باہر نظر آتی ہریالی ہر کسی کو ٹرین میں سفر کرنے پر مجبور کر دیتی ہے،ایسے سفر کے شوقین افراد کیلئے اب پاکستان ریلوے نے جاز کیش کے ساتھ مل کر مسافروں کو نئی سہولت فراہم کرنے کا فیصلہ کرلیا ہے۔
تفصیلات کے مطابق محکمہ ریلوے نے جاز کیش کے اشتراک سے اب مسافروں کیلئے نئی سہولت متعارف کرا کر ان کیلئے ایک شہر سے دوسرے شہر میں جانا آسان بنا دیا ہے۔
مسافراس سہولت کا فائدہ اٹھاتے ہوئے اپنے آن لائن ایپ جاز کیش سے نہ صرف ریلوے کی ٹکٹیں خرید سکیں گے بلکہ پیسے بھی نہیں دینے پڑیں گے۔
ریل کے سفر کے شوقین افراد اب پہلے خریدو،بعد میں پیسے ادا کرو پالیسی کے تحت باآسانی ٹکٹ خرید کر سفر کر سکیں گے۔
اس پالیسی کے تحت جازکیش صارف ایک وقت میں 20ہزار روپے تک کی ٹکٹیں گھر بیٹھے ہی خرید سکیں گے اور ٹکٹوں کے پیسے 3 ماہ تک جازکیش کو جمع کروائیں گے۔
ذرائع کے مطابق جاز کیش کی جانب سے پیش کی جانے والی آفر کے بعد ریلوے حکام نے بھی منصوبے کی تکمیل کیلئے کام شروع کردیا ہے۔
