سوہاوہ: عدالت نے تھانہ ڈومیلی میں درج منشیات فروشی کے مقدمے کا فیصلہ سنا دیا۔ جرم ثابت ہونے پر مجرم کو 9 سال قید بامشقت اور 80 ہزار روپے جرمانے کی سزا سنا دی گئی۔
ترجمان جہلم پولیس کے مطابق معزز عدالت نے تھانہ ڈومیلی میں درج منشیات فروشی کے مقدمہ نمبر 206/26، بجرم CNSA 9(1)6C، کا فیصلہ سنایا۔ مجرم محمد اشفاق ولد محمد اختر سکنہ ڈھوک رحم علی نے سال 2026 میں 1400 گرام چرس رکھنے اور منشیات فروشی کے جرم کا ارتکاب کیا تھا۔
جہلم پولیس نے مجرم کو جدید تفتیشی اور تکنیکی ذرائع کی مدد سے ٹریس کرکے گرفتار کیا اور مقدمے کی تفتیش مکمل کرنے کے بعد ٹھوس شواہد کی بنیاد پر چالان عدالت میں پیش کیا۔ عدالت میں پراسیکیوشن کی جانب سے پیش کیے گئے شواہد، گواہان کے بیانات اور پولیس کی مکمل تفتیش کی روشنی میں جرم ثابت ہو گیا، جس پر عدالت نے مجرم کو 9 سال قید بامشقت اور 80 ہزار روپے جرمانے کی سزا سنائی۔
اس موقع پر ڈی پی او جہلم شفیق احمد چوہدری نے کہا کہ منشیات فروش معاشرے کا ناسور ہیں، جن کے خلاف بھرپور کریک ڈاؤن جاری ہے۔ منشیات فروشوں کو کسی صورت معاف نہیں کیا جائے گا۔
انہوں نے مزید کہا کہ جہلم پولیس منشیات کی لعنت کے خاتمے کے لیے پُرعزم ہے اور نوجوان نسل کو منشیات سے محفوظ رکھنے کے لیے ہر ممکن اقدامات کیے جا رہے ہیں۔ عوام بھی منشیات فروشوں کی نشاندہی کرکے پولیس کا ساتھ دیں، تاکہ معاشرے کو اس لعنت سے پاک کیا جا سکے۔


