دینہ: حلقہ این اے 60جہلم ون سے مسلم لیگ (ن) کے امیدوار بلال اظہر کیانی نے پی ٹی آئی کے حمایت یافتہ آزاد ا میدوار حسن عدیل کو شکست دے کر کامیابی حاصل کر لی جبکہ حلقہ پی پی 24سے پی ٹی آئی کے حمایت یافتہ آزاد امیدوار سید رفعت زیدی نے میدان مار لیا۔
تفصیلات کے مطابق عام انتخابات 2024میں حلقہ این اے 60 جہلم ون میں کانٹے دار مقابلے کے بعد مسلم لیگ (ن) کے مرکزی رہنما و امیدوار ایم این اے بلال اظہر کیانی نے تحریک انصاف کے حمایت یافتہ آزاد امیدوار حسن عدیل کو بھاری اکثریت سے شکست دے کر کامیابی حاصل کر لی۔
مسلم لیگ (ن) کے بلال اظہر کیانی نے 99948ووٹ حاصل کیے جبکہ ان کے مد مقابل امیدوار حسن عدیل نے 90474ووٹ اور تحریک لبیک پاکستان کے حمایت یافتہ آزاد امیدوار چوہدری زاہد اختر 24273 ووٹ حاصل کئے۔
حلقہ پی پی 24جہلم ون (تحصیل دینہ، سوہاوہ) سے پاکستان تحریک انصاف کے حمایت یافتہ آزاد امیدوار نے رفعت زیدی نے 55029جبکہ ان کے مدمقابل مسلم لیگ (ن) کے حمایت یافتہ استحکام پاکستان پارٹی کے امیدوار راجہ یاور کمال نے 49781ووٹ حاصل کیے، اسی طرح تحریک لبیک کے امیدوار سید عرفان حسین شاہ بخاری نے تیسری پوزیشن حاصل کرتے ہوئے 30031ووٹ حاصل کیے۔
مسلم لیگ (ن) کے بلال اظہر کیانی کی جیت پر مسلم لیگ (ن) کے کارکنوں کا جشن جبکہ اسی طرح آزاد امیدوار پی پی 24رفعت زیدی کی جیت پر کارکنوں کا جشن کا سماں ہے۔
ضلع جہلم میں مسلم لیگ (ن ) نے دونوں قومی نشستوں پر چوہدری فرخ الطاف اور بلال اظہر کیانی نے کامیابی حاصل کی اور ضلع جہلم کی تینوں صوبائی اسمبلی کی نشستیں تحریک انصاف کی حمایت یافتہ آزاد امیدوار سید رفعت زیدی ، یاسر قریشی اور مشتاق احمدنے کامیابی حاصل کی ہے۔
