جہلم: عالمی یوم جنگلات کے موقع پر مشیر صحت پنجاب میجر جنرل (ر) ڈاکٹر اظہر محمود کیانی اور ڈپٹی کمشنر جہلم میثم عباس نے ضلع کچہری میں شجرکاری مہم کے تحت پودے لگائے۔ اس موقع پر ضلع بھر کے سرکاری و نجی دفاتر میں بھی سینکڑوں پودے لگائے گئے، جس کا مقصد پاکستان کو سرسبز و شاداب بنانا ہے۔
وزیراعلیٰ پنجاب کی خصوصی ہدایات پر پلانٹ فار پاکستان مہم کے تحت سرکاری اور نجی دفاتر میں افسران و ملازمین نے بڑھ چڑھ کر حصہ لیا اور بڑی تعداد میں درخت لگائے۔
اس موقع پر مشیر صحت پنجاب ڈاکٹر اظہر کیانی نے کہا کہ جنگلات کی مسلسل کٹائی اور کمی کے باعث دنیا موسمیاتی تبدیلیوں کے شدید اثرات کی زد میں ہے، جن سے نمٹنے کے لیے ہر فرد کو شجرکاری میں اپنا کردار ادا کرنا ہوگا۔ انہوں نے مزید کہا کہ درخت نہ صرف ماحولیاتی آلودگی کو کم کرتے ہیں بلکہ زمین کی زرخیزی میں بھی اضافہ کرتے ہیں۔
ڈپٹی کمشنر جہلم میثم عباس نے اس موقع پر کہا کہ پاکستان میں جنگلات کا رقبہ عالمی معیار سے کم ہے، جسے پورا کرنے کے لیے بھرپور شجرکاری ناگزیر ہے۔ انہوں نے اس عزم کا اعادہ کیا کہ سرسبز پاکستان ہی مستحکم پاکستان کی بنیاد ہے، اور اس مقصد کے لیے زیادہ سے زیادہ درخت لگانے اور ان کی حفاظت کو یقینی بنانا ضروری ہے۔
