جہلم پولیس کی اہم کارروائیوں میں دو خواتین منشیات فروشوں کو گرفتار کر کے بھاری مقدار میں منشیات برآمد کر لی گئی۔
تفصیلات کے مطابق جہلم میں ایس ایچ او کالا گجراں اور ان کی ٹیم نے اہم کارروائی کرتے ہوئے ملزمہ شکیلہ بیگم کو گرفتار کر لیا۔ ملزمہ کے قبضے سے 1 کلو 420 گرام چرس برآمد کی گئی۔ کالا گجراں پولیس نے ملزمہ کے خلاف تھانہ کالا گجراں میں انسداد منشیات ایکٹ کے تحت مقدمہ درج کر لیا۔
دوسری جانب ایس ایچ او سٹی اور ان کی ٹیم نے کارروائی کے دوران ملزمہ نصرت بی بی کو گرفتار کر لیا۔ ملزمہ کے قبضے سے 2 کلو 50 گرام ہیروئن برآمد کی گئی۔ سٹی پولیس نے ملزمہ کے خلاف تھانہ سٹی میں انسداد منشیات ایکٹ کے تحت مقدمہ درج کر لیا۔
ڈسٹرکٹ پولیس آفیسر جہلم طارق عزیز سندھو نے ان کامیاب کارروائیوں کو سراہتے ہوئے کہا کہ منشیات فروش معاشرے کا ناسور ہیں اور ان کے خلاف کارروائیاں مزید تیز کی جا رہی ہیں۔
انہوں نے شہریوں سے بھی اپیل کی کہ وہ پولیس کے ساتھ تعاون کریں اور ایسے عناصر کی نشاندہی کریں جو معاشرے کو نقصان پہنچا رہے ہیں۔
