جہلم: پنجاب فوڈ اتھارٹی نے جی ٹی روڈ پر ناکہ بندی کے دوران بڑی کارروائی کرتے ہوئے ناقص اور مضر صحت دودھ سپلائی کرنے والی دو گاڑیوں کو پکڑ لیا اور سینکڑوں لیٹر غیر معیاری دودھ تلف کر دیا۔
ترجمان پنجاب فوڈ اتھارٹی کے مطابق جی ٹی روڈ جہلم پر معمول کی چیکنگ کے دوران مشتبہ گاڑیوں کو روک کر دودھ کے نمونے چیک کیے گئے۔ جانچ پڑتال کے دوران دودھ غیر معیاری اور انسانی صحت کے لیے مضر پایا گیا، جس پر فوری کارروائی کرتے ہوئے دونوں گاڑیوں سے برآمد ہونے والا 700 لیٹر ناقص دودھ موقع پر تلف کر دیا گیا۔
ترجمان کے مطابق ضبط کیا گیا دودھ سرگودھا اور منڈی بہاؤالدین سے جہلم، دینہ اور راولپنڈی کے مختلف علاقوں میں سپلائی کیا جانا تھا۔ بروقت کارروائی کے باعث مضر صحت دودھ بڑی تعداد میں صارفین تک پہنچنے سے پہلے ہی تلف کر دیا گیا۔
پنجاب فوڈ اتھارٹی نے ناقص دودھ سپلائی کرنے والی گاڑیوں کے مالکان کے خلاف قانونی کارروائی کرتے ہوئے مجموعی طور پر 60 ہزار روپے جرمانہ بھی عائد کیا ہے۔
فوڈ اتھارٹی حکام کا کہنا ہے کہ عوام کو معیاری اور محفوظ خوراک کی فراہمی یقینی بنانے کے لیے صوبہ بھر میں چیکنگ کا سلسلہ جاری ہے اور خوراک میں ملاوٹ یا غیر معیاری اشیاء فروخت کرنے والوں کے خلاف بلاامتیاز کارروائیاں کی جا رہی ہیں۔
ترجمان نے مزید کہا کہ انسانی صحت سے کھیلنے والے عناصر کے ساتھ کوئی رعایت نہیں برتی جائے گی اور ملاوٹ مافیا کے خلاف سخت قانونی کارروائی جاری رہے گی۔
شہریوں سے بھی اپیل کی گئی ہے کہ اگر انہیں کہیں غیر معیاری یا مشکوک خوراک فروخت ہوتی نظر آئے تو فوری طور پر پنجاب فوڈ اتھارٹی کو اطلاع دیں تاکہ بروقت کارروائی عمل میں لائی جا سکے۔
