سوہاوہ کے علاقے پڑی درویزہ، جو یونین کونسل نمبر 6 کا صدر مقام بھی ہے، میں نصب ایک موبائل ٹاور پر تین مختلف سیلولر کمپنیوں کی سروس فراہم کیے جانے کے باوجود صارفین کو مشکلات کا سامنا ہے۔ علاقہ مکینوں نے متعلقہ حکام سے مطالبہ کیا ہے کہ موبائل سروس کی بہتری کے لیے فوری اور مؤثر اقدامات کیے جائیں تاکہ صارفین کی مشکلات کا ازالہ ممکن ہو سکے۔
رپورٹ کے مطابق جہلم کی تحصیل سوہاوہ کے علاقے پڑی درویزہ میں کچھ عرصہ قبل یوفون (Ufone) کمپنی کا ایک موبائل ٹاور نصب کیا گیا تھا۔ اب اطلاعات کے مطابق اسی ٹاور پر یوفون کے علاوہ زونگ (Zong) اور ٹیلی نار (Telenor) کی سروسز کے کنکشن بھی نصب کیے گئے ہیں، تاہم علاقہ بھر کے صارفین کو ان کمپنیوں کی موبائل سروس کے حوالے سے مختلف مسائل کا سامنا کرنا پڑ رہا ہے۔
مقامی صارفین کی شکایت ہے کہ جب بھی بجلی کی فراہمی معطل ہوتی ہے تو ان کمپنیوں کی موبائل سروس متاثر ہو جاتی ہے، جس کے باعث انہیں رابطوں اور دیگر ضروری امور کی انجام دہی میں مشکلات پیش آتی ہیں۔ صارفین کے مطابق موجودہ دور میں موبائل فون اور انٹرنیٹ سروس روزمرہ زندگی کی اہم ضرورت بن چکی ہے، اس لیے سروس میں تعطل سے عوام کو پریشانی کا سامنا کرنا پڑتا ہے۔
علاقہ مکینوں نے چیئرمین پاکستان ٹیلی کمیونیکیشن اتھارٹی (پی ٹی اے) اور دیگر متعلقہ حکام سے پُرزور مطالبہ کیا ہے کہ پڑی درویزہ میں نصب مذکورہ موبائل ٹاور پر تینوں کمپنیوں کی سروس کو باقاعدہ، موثر اور بہتر بنانے کے لیے خصوصی اقدامات کیے جائیں۔ انہوں نے مطالبہ کیا کہ بجلی کی بندش کے دوران بھی موبائل سروس کی فراہمی یقینی بنانے کے لیے ضروری انتظامات کیے جائیں تاکہ صارفین کو درپیش مشکلات سے نجات مل سکے۔
