جہلم: وچلہ بیلہ کے 7 دیہات آج کے ترقی یافتہ دور میں پل کی تعمیر مکمل نہ ہونے کیوجہ سے سخت مشکلات سے دوچار، علاقہ مکینوں نے فوری پل کی تعمیر مکمل کرنے کا مطالبہ کردیا۔
تفصیلات کے مطابق سابق حکومت نے وچلہ بیلہ پل جو کہ دریائے جہلم پر تعمیر ہونا تھا جس کا 90 فیصد کام مکمل ہو چکا ہے ۔ حکومت کی تبدیلی کے بعد سابق حکومت نے علاقہ مکینوں کو سہولیات پہنچانے کی بجائے سیاسی بدلہ لیتے ہوئے فنڈز روک لئے ، جس کی وجہ سے آج کے ترقی یافتہ دور میں بھی وچلہ بیلہ کے مکین ڈولی لفٹ کے ذریعے دریا عبور کرنے پر مجبور ہیں۔
مکینوں کا کہنا ہے کہ سابق حکومت نے علاقہ مکینوں کی مشکلات کو مدنظر رکھتے ہوئے پل کی تعمیر شروع کروائی اس طرح دریائے جہلم پر تعمیر ہونے والے پل کا کام 90 فیصد مکمل ہو چکا ہے لیکن جیسے ہی حکومت کی تبدیلی ہوئی تو پل کی تعمیر کے فنڈز روک دیئے گئے جس کے باعث علاقہ مکینوں کو آمدورفت میں شدید دشواری کا سامنا ہے۔
علاقہ مکینوں نے نگران وزیر اعلیٰ پنجاب، چیف سیکرٹری پنجاب سے مطالبہ کیاہے کہ وچلہ بیلہ پل کو مکمل کروایا جائے تاکہ علاقہ مکینوں کو پیش آنے والی مشکلات کا خاتمہ ممکن ہو سکے۔
