پنڈدادنخان: پولیس نے نگہبان رمضان کارڈ میں رقم کی کٹوتی کرنے والے ملزم کے خلاف فوری کارروائی کرتے ہوئے اسے گرفتار کر لیا۔
ترجمان جہلم پولیس کے مطابق ایس ایچ او تھانہ پنڈدادنخان اور ان کی ٹیم نے بروقت ایکشن لیتے ہوئے نگہبان رمضان کارڈ کے تحت امدادی رقوم کی ادائیگی کے دوران غیر قانونی کٹوتی کرنے والے ملزم کو حراست میں لے کر اس کے خلاف مقدمہ درج کر لیا ہے۔
پولیس کے مطابق ملزم کے قبضے سے مستحقین سے دھوکے سے ہتھیائی گئی 2,200 روپے کی رقم بھی برآمد کر لی گئی ہے۔ بتایا گیا ہے کہ تھانہ پنڈدادنخان کے علاقے میں ملزم وزیر اعلیٰ پنجاب کی جانب سے جاری کردہ نگہبان رمضان کارڈ کے تحت ملنے والی امدادی رقم کی ادائیگی کے دوران مستحق افراد سے مختلف حیلے بہانوں سے رقم کاٹ رہا تھا اور انہیں مکمل رقم فراہم نہیں کرتا تھا۔
ترجمان جہلم پولیس نے کہا کہ سرکاری امدادی اسکیموں میں بدعنوانی اور مستحقین کے استحصال کے خلاف زیرو ٹالرنس پالیسی کے تحت سخت قانونی کارروائیاں عمل میں لائی جا رہی ہیں۔
ڈسٹرکٹ پولیس آفیسر جہلم شفیق احمد چوہدری نے اس موقع پر کہا کہ جہلم پولیس عوام کے حقوق کے تحفظ اور قانون کی بالادستی کو یقینی بنانے کے لیے ہر ممکن اقدامات جاری رکھے ہوئے ہے، اور سرکاری امداد میں خردبرد یا استحصال کرنے والے عناصر کسی رعایت کے مستحق نہیں۔
