دینہ میں پاکستان کا 78 واں یوم آزادی قومی جوش و جذبہ اور پرعزم طریقے سے منایا گیا۔
تفصیلات کے مطابق جہلم کی دینہ میں 78ویں یوم آزادی کی پروقار تقریب منعقد ہوئی جس میں اسسٹنٹ کمشنر دینہ صفاء عابد، سابق ایم پی اے مہر محمد فیاض، چیف آفیسر میونسپل کمیٹی محمد فیصل، تحصیلدار دینہ شمشیر حیدر رانجھا سمیت علاقہ بھر کی سیاسی، سماجی اور کاروباری شخصیات کی کثیر تعداد نے شرکت کی۔
میونسپل کمیٹی پارک میں منعقد کی گئی تقریب میں سبز ہلالی پرچم لہرایا گیا، ریسکیو 1122 اور پولیس نے سلامی پیش کی، اور قومی ترانہ کے بعد تقریب کا آغاز ہوا۔
خطاب کرتے ہوئے اسسٹنٹ کمشنر صفاء عابد نے کہا کہ آزاد وطن میں زندگی گزارنے جیسی کوئی نعمت نہیں، یہ سب ہمارے بڑوں کی قربانیوں کا نتیجہ ہے۔ نوجوان نسل بھرپور تعلیم حاصل کرے تاکہ ملک و قوم کی خدمت کر سکے۔ انہوں نے کہا کہ پاکستان جیسا ملک دنیا میں کہیں نہیں، ہم زندہ دل قوم ہیں جو مشکل وقت میں یکجہتی کا مظاہرہ کرتی ہے۔
تقریب سے سابق ایم پی اے مہر محمد فیاض نے کہا کہ ہم اللہ تعالیٰ کا شکر ادا کرتے ہیں کہ ایک آزاد ملک میں سکون کی سانس لے رہے ہیں، ہماری مسلح افواج نے جس طرح ملک دشمن بھارت کو سبق سکھایا وہ تاریخ میں ہمیشہ یاد رکھا جائے گا۔
تقریب میں راجہ مبارک کیانی، راجہ افرا سیاب، ملک وقار، سابق چیئرمین شیخ اکرام الٰہی، میاں عتیق، چوہدری محبوب، الیاس ڈار، طارق خان، چوہدری کبریہ، راجہ سرفراز لمبردار، ملک صداقت، راجہ ساجد نواز اور دیگر نے بھی شرکت کی اور یوم آزادی کی مبارکباد پیش کی۔
