جہلم: ڈپٹی کمشنر میثم عباس کی ہدایت پر میونسپل کمیٹی کے اینٹی انکروچمنٹ عملے نے چوک اہلحدیث میں تجاوزات مافیا کے خلاف ایک بھرپور گرینڈ آپریشن کیا۔ اس کارروائی میں ہیوی مشینری کے ذریعے پختہ دیواریں اور دیگر غیر قانونی تعمیرات کو گرا دیا گیا۔
میونسپل عملے نے مین بازار اور چوک اہلحدیث میں رکھی گئی متعدد ریڑھیاں اور سامان قبضے میں لے لیا جبکہ کئی افراد پر بھاری جرمانے عائد کیے گئے۔
تجاوزات مافیا کی غیر قانونی سرگرمیاں عرصہ دراز سے عوام کے لیے سنگین مسائل کا سبب بنی ہوئی تھیں۔ غیر قانونی تجاوزات کی بھرمار نے نہ صرف پیدل چلنے والوں کے لیے مشکلات پیدا کیں بلکہ ٹریفک کی روانی کو بھی شدید متاثر کیا۔ بازاروں میں جگہ کی کمی اور تجاوزات کے باعث خریداروں کو وقت اور وسائل کا ضیاع سہنا پڑتا تھا۔ ان غیر قانونی تعمیرات نے شہریوں کی روزمرہ زندگی کو مشکل اور بازاروں کی خوبصورتی کو متاثر کیا تھا۔
یہ آپریشن حکومت پنجاب کی مہم کا حصہ ہے، جس کا مقصد عوام کو بہتر سہولتیں فراہم کرنا اور شہروں کو خوبصورت بنانا ہے۔ شہریوں نے چوک اہلحدیث میں کیے گئے گرینڈ آپریشن کو انتظامیہ کی شاندار کارکردگی قرار دیتے ہوئے خراج تحسین پیش کیا۔ دکانداروں اور مقامی افراد نے ڈپٹی کمشنر میثم عباس اور ان کی ٹیم کی کاوشوں کو سراہتے ہوئے مطالبہ کیا کہ تجاوزات کے خلاف یہ مہم مستقل بنیادوں پر جاری رکھی جائے۔
آپریشن کے بعد چوک اہلحدیث ایک کھلے میدان کی صورت اختیار کر گیا، جو تجاوزات مافیا کے خاتمے کی ایک روشن مثال بن چکا ہے۔ انتظامیہ کا عزم ہے کہ بازاروں کو تجاوزات سے پاک کرتے ہوئے شہریوں کو صاف ستھرا ماحول فراہم کیا جائے۔
شہریوں کا کہنا ہے کہ اگر یہ آپریشن تسلسل کے ساتھ جاری رہا تو نہ صرف ٹریفک کی روانی بحال ہوگی بلکہ صاف اور خوبصورت ماحول بھی میسر آئے گا۔
حکومت پنجاب کی اس مؤثر کارروائی نے عوام کو یقین دلایا ہے کہ ان کے مسائل کے حل کے لیے انتظامیہ ہر ممکن اقدام کر رہی ہے۔ شہریوں نے اس بات پر زور دیا کہ تجاوزات مافیا کے خلاف سخت قانون کا نفاذ جاری رکھا جائے۔
شہریوں نے ڈپٹی کمشنر جہلم میثم عباس، ایڈمنسٹریٹر میونسپل کمیٹی صباء سحر، سی او میونسپل کمیٹی مبارک اور اینٹی انکروچمنٹ عملے کی خدمات کو سراہتے ہوئے محمدی چوک، بلال ٹاؤن، ٹاہلیانوالہ روڈ، روہتاس روڈ، اور کالا گوجراں میں بھی ایسے آپریشنز شروع کرنے کا مطالبہ کیا ہے۔
