سوہاوہ: گورنمنٹ گرلز ایلیمنٹری سکول پدھری میں سالانہ رزلٹ کی رنگا رنگ اور پروقار تقریب کا انعقاد کیا گیا۔
تقریب میں طالبات نے شاندار ٹیبلوز اور مختلف پرفارمنس پیش کر کے حاضرین کے دل جیت لیے جبکہ نمایاں کارکردگی دکھانے والی طالبات میں انعامات بھی تقسیم کیے گئے۔
تقریب کے مہمانانِ خصوصی میں معروف معالج ڈاکٹر صداقت حسین، سماجی شخصیات راجہ طلعت محمود اور راجہ زاہد محمود اور گورنمنٹ بوائز ہائی سکول پدھری کے ہیڈ ماسٹر احمد شاہ شامل تھے۔ ان کے علاوہ محمد مختار، طاہر سمیت طالبات کے والدین اور مقامی معززین نے بڑی تعداد میں شرکت کی۔
تقریب کا آغاز تلاوتِ کلامِ پاک اور نعتِ رسولِ مقبول ﷺ سے ہوا۔ سکول آمد پر مہمانوں کا شاندار استقبال کیا گیا جبکہ طالبات نے "ویلکم ٹیبلوز” سمیت مختلف موضوعات پر دلکش پرفارمنسز پیش کیں، جنہیں شرکاء نے خوب سراہا۔
تقریب سے خطاب کرتے ہوئے ہیڈ مسٹریس مسرت وقار نے تمام مہمانوں اور والدین کا شکریہ ادا کیا اور کامیاب طالبات کو دل کی گہرائیوں سے مبارکباد پیش کی۔
انہوں نے کہا کہ یہ کامیابی ان طالبات کی محنت اور اساتذہ کی رہنمائی کا نتیجہ ہے۔ مزید کہا کہ آئندہ تعلیمی سال کے داخلے شروع ہو چکے ہیں، والدین سے گزارش ہے کہ اپنی بیٹیوں کو لازمی سکول میں داخل کروائیں اور ارد گرد کے لوگوں کو بھی مفت تعلیم کی سہولت سے آگاہ کریں۔
انہوں نے زور دیا کہ والدین اور اساتذہ کے تعاون سے ہی تعلیم کے فروغ کی یہ مہم کامیاب ہو سکتی ہے اور بچیوں کو ایک روشن مستقبل دیا جا سکتا ہے۔
