جہلم: دریائے جہلم میں نہاتے ہوئے ستھرا پنجاب کا ملازم ڈوب گیا، ریسکیو 1122 نے تلاش شروع کر دی۔
تفصیلات کے مطابق جہلم میں پکھوال پرانی چیئر لفٹ کے قریب ستھرا پنجاب کے دو ملازمین نے پکھوال پل سے دریائے جہلم میں نہانے کے لیے چھلانگ لگائی، تاہم اس دوران ایک ملازم پانی میں ڈوب گیا۔
ریسکیو 1122 کے مطابق واقعے کی اطلاع ملتے ہی ریسکیو کنٹرول جہلم نے فوری کارروائی کرتے ہوئے ایک ریسکیو موٹر بائیک، ایک ریسکیو ایمبولینس، ایک ریسکیو وہیکل اور ایک واٹر ریسکیو وین جائے حادثہ کی جانب روانہ کر دی۔ ریسکیو ٹیموں نے موقع پر پہنچ کر ڈوبنے والے شخص کی تلاش کے لیے سرچ آپریشن شروع کیا۔
ریسکیو حکام کے مطابق ڈوبنے والے ملازم کی تلاش کے لیے جاری واٹر ریسکیو آپریشن میں 13 ریسکیو اہلکار حصہ لے رہے ہیں۔ سرچ آپریشن کے دوران بوٹ پروپیلر تکنیک، لائن سرچ، ہُک سرچ اور سکوبا سرچ سمیت مختلف طریقے استعمال کیے جا رہے ہیں، تاکہ دریا میں ڈوبنے والے شخص کا سراغ لگایا جا سکے۔
ریسکیو 1122 نے آپریشن کی موثر نگرانی، ٹیموں کے درمیان رابطہ کاری اور معلومات کی بروقت ترسیل کے لیے جائے حادثہ کے قریب انسیڈنٹ کمانڈ پوسٹ بھی قائم کر دی ہے۔ ڈسٹرکٹ ایمرجنسی آفیسر جہلم انجینئر سعید احمد اپنی نگرانی میں سرچ آپریشن کی قیادت کر رہے ہیں۔
ریسکیو حکام کے مطابق جائے حادثہ پر دریائے جہلم میں پانی کے بہاؤ کی رفتار تقریباً 30 میٹر فی منٹ، گہرائی 8 سے 10 فٹ اور چوڑائی تقریباً 300 فٹ ہے۔ دریا کی وسعت اور پانی کے بہاؤ کو مدنظر رکھتے ہوئے مختلف تکنیکوں کے ذریعے تلاش کا عمل جاری رکھا جا رہا ہے۔
ریسکیو اہلکار اب تک تقریباً 200 میٹر کے علاقے میں سرچ آپریشن کر چکے ہیں، تاہم ڈوبنے والے ملازم کا تاحال سراغ نہیں مل سکا۔ ریسکیو 1122 کے مطابق شخص کی تلاش کے لیے واٹر ریسکیو آپریشن جاری ہے۔
