جہلم سمیت ملک بھر میں عیدالفطر سے قبل اوپن مارکیٹ میں سبزیوں اور پھلوں کی قیمتوں میں ہوشربا اضافہ دیکھا گیا۔
ضلع جہلم میں عید قریب آتے ہی روزمرہ استعمال کی سبزیوں کی قیمتیں آسمان سے باتیں کرنے لگیں، ادرک لہسن، 400، ٹماٹر100، لیموں دو سو روپے کلو مہنگا کر دیا گیا۔
ٹماٹر کی فی کلو قیمت 100 روپے اضافے کے ساتھ 180 روپے تک پہنچ گئی، لیموں 200 روپے اضافے کے ساتھ 400 روپے کلو تک فروخت کیا جا رہا ہے، پیاز کی قیمت میں بھی 40 روپے کا اضافہ 180 روپے کلو فروخت کیا جارہا ہے۔ شہریوں نے پرائس کنٹرول کمیٹی فعال بنانے کا مطالبہ کردیا۔
دوسری جانب فروری 2024 کے مقابلے میں مارچ میں مہنگائی 1 اعشاریہ 71 فیصد بڑھ گئی۔ ادارہ شماریات کی جاری کردہ مہنگائی کی ماہانہ رپورٹ کے مطابق فروری 2024 کے مقابلے میں مارچ میں مہنگائی 1 اعشاریہ 71 فیصد بڑھ گئی ہے۔ مارچ میں مہنگائی کی شرح 20 اعشاریہ 68 فیصد ریکارڈ کی گئی۔
رپورٹ کے مطابق جولائی تا مارچ مہنگائی کی اوسط شرح 27 اعشاریہ 06 فیصد رہی اور گزشتہ ماہ شہری علاقوں میں مہنگائی میں 1 اعشاریہ 43 فیصد اضافہ ہوا۔
مارچ میں دیہی علاقوں میں مہنگائی میں 2 اعشاریہ 13 فیصد اضافہ ہوا جبکہ شہری علاقوں میں مہنگائی کی شرح 21 اعشاریہ 90 فیصد رہی۔ گزشتہ ماہ دیہی علاقوں میں مہنگائی 18 اعشاریہ 97 فیصد رکارڈ کی گئی۔
ادارہ شماریات کے مطابق ماہانہ بنیادوں پر ٹماٹر 52 اعشاریہ 1 فیصد، پیاز 28 فیصد، آلو 23 اعشاریہ 6 اور پھل 21 اعشاریہ 9 فیصد مہنگے ہوئے۔
اس دوران سبزیاں 12 اعشاریہ 8، بجلی 5 اعشاریہ 1 اور گوشت 4 فیصد مہنگا ہوا۔ سالانہ بنیادوں پر گیس 318 فیصد اور بجلی 73 فیصد مہنگی ہوئی۔ ایک سال میں ٹماٹر 188 اعشاریہ 4، پیاز 84، سبزیاں 55 اور مصالحہ جات 49 فیصد مہنگے ہوئے۔
