سوہاوہ: ڈپٹی کمشنر جہلم میر رضا اوزگن کی ہدایت پر اسسٹنٹ کمشنر سوہاوہ غزالہ اصغر نے تحصیل ہیڈ کوارٹر( THQ )ہسپتال سوہاوہ کا تفصیلی دورہ کیا۔ دورے کا مقصد مریضوں کو فراہم کی جانے والی طبی سہولیات، ادویات کے سٹاک اور ڈاکٹروں سمیت پیرا میڈیکل سٹاف کی حاضری کا جائزہ لینا تھا۔
دورانِ معائنہ اسسٹنٹ کمشنر نے ایمرجنسی وارڈ، فارمیسی اور آؤٹ ڈور شعبوں کا تفصیلی معائنہ کیا۔ انہوں نے زیرِ علاج مریضوں سے ملاقات کر کے علاج معالجے، ادویات کی دستیابی اور مفت فراہمی سے متعلق دریافت کیا، جبکہ ہسپتال کے مجموعی انتظامات کا بھی جائزہ لیا۔
اس موقع پر انہوں نے انتظامیہ کو صفائی کے معیار کو ہر صورت برقرار رکھنے اور مریضوں کے ساتھ خوش اخلاقی سے پیش آنے کی سخت ہدایات جاری کیں۔
اسسٹنٹ کمشنر غزالہ اصغر نے واضح کیا کہ ڈپٹی کمشنر جہلم میر رضا اوزگن کے ویژن کے مطابق صحت کے شعبے میں بہتری ضلعی انتظامیہ کی اولین ترجیحات میں شامل ہے۔ انہوں نے ہدایت کی کہ مریضوں کو کسی قسم کی پریشانی کا سامنا نہ ہو، تمام طبی مشینری ہمہ وقت فعال رکھی جائے اور فرائض میں غفلت برتنے والے عملے کے خلاف سخت کارروائی عمل میں لائی جائے گی۔
