جہلم: بجلی صارفین کو ریلیف فراہم کرنے کیلیے پاور ڈویژن نے اہم اقدامات اٹھائے ہیں۔
پاور ڈویژن کی جانب سے جاری اعلامیے کے مطابق ستمبر کی متوقع فیول پرائس ایڈجسٹمنٹ 6 سے کم کر کے 2 روپے 56 پیسے فی یونٹ تک محدود کر دی گئی، صارفین کو 3 روپے 44 پیسے فی یونٹ کے اضافی بوجھ سے بچا لیا گیا۔
اعلامیے میں کہا گیا کہ اضافی بوجھ سے بچانے کیلیے ستمبر میں 2 سے اڑھائی گھنٹے کی محدود لوڈ مینجمنٹ کی گئی، ستمبر کی فیول پرائس ایڈجسٹمنٹ 6 روپے فی یونٹ تک پہنچ سکتی تھی، مہنگے متبادل ایندھن سے بجلی پیداوار کے اثرات کم کرنے کیلیے ہدفی بنیادوں پر لوڈ مینجمنٹ کی گئی۔
پاور ڈویژن نے مزید کہا کہ درآمدی ایل این جی کی قیمتوں کے اثرات کم کر کے اضافی مالی بوجھ محدود رکھنے کی کوشش کی، ستمبر کی فیول پرائس ایڈجسٹمنٹ 2 روپے 56 پیسے فی یونٹ رہنے کی توقع ہے۔
اعلامیے میں یہ بھی کہا گیا کہ سردیوں میں گھریلو گیس کی طلب بڑھنے سے گیس کی دستیابی مزید محدود ہونے کا خدشہ ہے، پاور سیکٹر کو نظام کا استحکام برقرار رکھنے کیلیے آر ایل این جی درکار رہے گی۔
