جہلم: ڈپٹی کمشنر جہلم میر رضا اوزگن نے ضلع میں اشیائے خورد و نوش کی قیمتوں کو قابو میں رکھنے اور عوام کو ریلیف فراہم کرنے کے لیے پرائس کنٹرول مجسٹریٹس کے ساتھ اہم اجلاس کی صدارت کی۔
اجلاس میں مارکیٹوں میں اشیائے ضروریہ کی قیمتوں، دستیابی اور معیار کا تفصیلی جائزہ لیا گیا۔ ڈپٹی کمشنر نے ہدایت کی کہ تمام پرائس کنٹرول مجسٹریٹس باقاعدگی سے مارکیٹ وزٹ کریں، ناجائز منافع خوری اور ذخیرہ اندوزی کے خلاف سخت کارروائی کریں اور روزانہ کی بنیاد پر رپورٹ مرتب کر کے پیش کریں۔
انہوں نے واضح کیا کہ عوام کو معیاری اشیاء سرکاری نرخوں پر فراہم کرنے کے لیے مزید مؤثر اقدامات کیے جائیں جبکہ گراں فروشوں کے خلاف زیرو ٹالرنس پالیسی اپنائی جائے۔ ڈپٹی کمشنر نے کہا کہ گراں فروشوں کے کاروباری مراکز کو سیل کرنے میں کسی قسم کی رعایت نہیں برتی جائے گی تاکہ عوام کو حقیقی معنوں میں ریلیف فراہم کیا جا سکے۔
