جہلم: میونسپل کمیٹی جہلم کی نقشہ برانچ نے شہر میں بغیر منظور شدہ نقشوں اور متعلقہ اجازت ناموں کے تعمیر کی جانے والی کمرشل عمارتوں کے خلاف کارروائی کا آغاز کر دیا ہے، جس کے تحت مختلف علاقوں میں زیرِ تعمیر اور قائم کمرشل عمارتوں کا جائزہ لینے کے بعد متعلقہ مالکان کو نوٹسز جاری کیے جا رہے ہیں۔
تفصیلات کے مطابق میونسپل کمیٹی جہلم کے متعلقہ شعبے نے شہر کے مختلف علاقوں میں کمرشل عمارتوں کی تعمیرات کا جائزہ لیتے ہوئے ایسی عمارتوں کی نشاندہی کی ہے جن کے بارے میں مبینہ طور پر شکایات ہیں کہ وہ منظور شدہ نقشوں کے بغیر تعمیر کی گئی ہیں یا ان کی تعمیر کے دوران ضروری قانونی تقاضے پورے نہیں کیے گئے۔
ذرائع کے مطابق متعلقہ عمارتوں کے مالکان کو جاری کیے جانے والے نوٹسز میں ہدایت کی گئی ہے کہ وہ اپنی عمارتوں کے نقشے اور دیگر ضروری دستاویزات میونسپل کمیٹی سے منظور کروائیں اور تعمیراتی قوانین کے تحت تمام قانونی تقاضے پورے کریں تاکہ عمارتوں کی تعمیر کو ضابطوں کے مطابق یقینی بنایا جا سکے۔
میونسپل کمیٹی حکام کے مطابق شہر میں تعمیراتی قوانین پر عملدرآمد یقینی بنانا، شہریوں کی جان و مال کا تحفظ کرنا اور غیر قانونی تعمیرات کے باعث پیدا ہونے والے شہری و ٹریفک مسائل کی روک تھام کرنا متعلقہ ادارے کی ذمہ داری ہے۔ اسی مقصد کے تحت بغیر منظوری یا ضروری اجازت ناموں کے تعمیر ہونے والی کمرشل عمارتوں کے خلاف کارروائی جاری رکھی جائے گی۔
شہری حلقوں نے میونسپل کمیٹی جہلم کی جانب سے شروع کی جانے والی کارروائی کو خوش آئند قرار دیتے ہوئے مطالبہ کیا ہے کہ اس عمل کو بلاامتیاز، شفاف اور مؤثر انداز میں جاری رکھا جائے۔ ان کا کہنا ہے کہ شہر میں تعمیراتی قوانین کی یکساں پابندی یقینی بنانا ضروری ہے، تاکہ کسی بھی شخص کو قواعد و ضوابط کی خلاف ورزی کی اجازت نہ ملے۔
شہریوں نے مزید مطالبہ کیا کہ غیر منظور شدہ کمرشل عمارتوں کی مکمل جانچ پڑتال کی جائے اور جہاں قانونی خلاف ورزی ثابت ہو، وہاں متعلقہ قوانین کے مطابق کارروائی عمل میں لائی جائے تاکہ مستقبل میں غیر قانونی تعمیرات کی حوصلہ شکنی ہو اور جہلم میں تعمیراتی سرگرمیوں کو قانون اور ضابطوں کے مطابق منظم بنایا جا سکے۔
