جہلم کے گنجان آباد علاقوں میں مویشیوں کے باڑوں کی موجودگی اور ان کے فضلے کو سیوریج لائنوں میں بہانے سے سیوریج نظام میں خرابی پیدا ہوگئی ہے، جس کے نتیجے میں شہریوں کے مسائل میں مسلسل اضافہ ہو رہا ہے۔
متعدد بار ضلعی انتظامیہ اور ایم سی انتظامیہ نے ان باڑوں کو شہر سے باہر منتقل کرنے کی تاریخیں دیں، مگر اس پر عملدرآمد نہیں ہو سکا۔ اندرون شہر میں گوبر اور فضلہ سیوریج لائنوں کو بند رکھنے کا معمول بنتا جا رہا ہے، جس سے شہریوں کو مشکلات کا سامنا ہے۔
شہر کے گلی محلوں میں بھینسوں کے باڑوں کی وجہ سے گندگی اور سیوریج سسٹم کی بندش کا مسئلہ جاری ہے۔ ضلعی اور تحصیل انتظامیہ نے کئی بار منصوبہ بندی کی کہ ان باڑوں کو شہر سے باہر منتقل کیا جائے، مگر بدقسمتی سے عملی اقدامات نہ ہو سکے۔
شہریوں نے وزیراعلیٰ پنجاب، چیف سیکرٹری پنجاب اور سیکرٹری بلدیات سے اپیل کی ہے کہ اندرون شہر سے مویشی باڑے ختم کروائے جائیں تاکہ عوام کو اس پریشانی سے نجات مل سکے۔
