جہلم شہر اور گردو نواح میں میونسپل کمیٹی کے حکام کی مبینہ ملی بھگت سے لوڈر رکشوں اور ٹھیلہ فروشوں نے سڑکوں پر قبضے جمالئے، تجاوزات کی بھرمار کی وجہ سے ٹریفک کی روانگی میں خلل پڑنے لگا۔ شہر کے چوک چوراہوں میں ٹریفک جام رہنے سے شہریوں کو شدید مشکلات کا سامنا ہے۔
تفصیلات کے مطابق جہلم شہر اور ملحقہ علاقوں کی سڑکوں پر لوڈر رکشے کھڑ ے کرکے چھوٹی چھوٹی موبائل دکانیں اور ٹھیلے لگا رکھے ہیں جو کہ میونسپل کمیٹی کے شعبہ انکروچمنٹ کی بے حسی کا منہ بولتا ثبوت ہے جس کی وجہ سے شہریوں کو آمدورفت میں شدید مشکلات کا سامنا کرنا پڑرہا ہے۔
جہلم شہر کے عین وسط میں واقع ریلوے روڈ ، سول لائن روڈ، اولڈ جی ٹی روڈ، تحصیل روڈسمیت ملحقہ آبادیوں کی سڑکوں پر تجاوزات مافیا نے شہر کی خوبصورتی کا حلیہ بگاڑ کے رکھ دیاہے ۔ جس کیوجہ سے سڑکوں کے دونوں اطراف جگہ پر بھی بااثر دکانداروں نے اپنا دکانوں کا سامان سجا کر کئی کئی فٹ تجاوز قائم کررکھی ہے جس کی وجہ سے سڑکوں پر سے گاڑیاں گزرتے وقت پیدل چلنے والے افراد کو سخت مشکلات کا سامنا کرنا پڑتا ہے۔
شہری تنظیموں کے عمائدین نے ڈپٹی کمشنر اور ایڈوائزر صوبائی محتسب پنجاب جہلم سے مطالبہ کیاہے کہ میونسپل کمیٹی کی حدود میں قائم ہونے والی تجاوزات کا خاتمہ کروایا جائے اور روزانہ کی بنیاد پر میونسپل کمیٹی کے شعبہ انسدادِ تجاوزات کو اندرون شہر قائم ہونے والی تجاوزات کو ختم کروانے کا پابند بنایا جائے تاکہ مستقل طور پر قائم ہونے والی تجاوزات کے خاتمے سمیت سڑکیں خوبصورت اور کشادہ ہو سکیں۔
