جہلم شہرکی بغل میں واقع ٹھیکریاں چک عبداللہ کےباسی آج کے ترقی یافتہ دور میں بنیادی سہولیات سے محروم، نجی ہاؤسنگ سوسائٹی نے سیوریج کا گندا پانی بھی آبادی کی طرف چھوڑ دیا، منتخب ممبران اور ضلعی انتظامیہ نے بھی مکینوں کے بنیادی مسائل سے منہ موڑ لیا، علاقہ مکین سراپا احتجاج ہیں۔
تفصیلات کے مطابق جہلم شہر سے محض چند کلو میٹر کے فاصلے پر موجود آبادی ٹھیکریاں چک عبداللہ کے رہائشی آج کے ترقی یافتہ دور میں بھی بنیادی سہولیات سے محروم ہیں۔
علاقہ مکینوں کاکہنا ہے کہ یہ عذاب نجی ہاؤسنگ سوسائٹی کی وجہ پیدا ہوا ہے۔ سوسائٹی مالکان نے سوسائٹی کی تعمیر سے قبل نکاسی آب کامعقول انتظام کرنے کاوعدہ کیا لیکن بعد میں مکر گئے اس کے بعد علاقہ مکینوں نے ایڈوائزر صوبائی محتسب سے رجوع کیا اور انہوں نے تحقیق کے بعد نکاسی آب کا معقول انتظام کرنے کا فیصلہ کیا لیکن بد قسمتی سے انتظامیہ نے صوبائی محتسب کے فیصلے پر عملدرآمد کرنے کی بجائے ہوا میں اڑا دیا جس کی وجہ سے مکینوں کو نکاسی آب کامعقول انتظام نہ ہونے کی وجہ سے سخت مشکلات کاسامنا ہے۔
مکینوں کاکہنا ہے کہ نجی ہاؤسنگ سوسائٹی کا گندا پانی اور بارشی پانی آبادی سے گزر رہاہے جس کی وجہ سے نکاسی آب کے نالے کے ارد گرد دونوں اطراف کے مکینوں کو سخت مشکلات کاسامنا ہے۔ نکاسی آب کامناسب انتظام نہ ہونے کیوجہ سے بیماریاں پھیلنے کااندیشہ بھی لاحق ہے۔
مکینوں نے وزیراعلی پنجاب مریم نواز اور ممبر قومی اسمبلی بلال اظہر کیانی سے نوٹس لینے اور مناسب انتظام کروانے کامطالبہ کیا ہے۔
