دینہ: سندھ کے بعد پنجاب میں بھی بے زبان مخلوق پر ظلم کی انتہاء، دینہ میں بااثر زمیندار نے کھیت میں جانے پر گائے کی ٹانگ توڑ دی، پولیس نے مقدمہ درج کر کے زمیندار کو گرفتار کر لیا۔
تفصیلات کے مطابق جہلم کی تحصیل دینہ کے علاقہ ڈوماں میں بااثر زمیندار زرین نے ساگری کے رہائشی ارسلان خالد کی گائے کھیتوں میں جانے پر گائے کی ٹانگ توڑ دی۔زمیندار نے ملازموں کے ساتھ ملکر ڈنڈے مار مار کر گائے کی ایک ٹانگ توڑی۔
تھانہ منگلا کینٹ پولیس نے گائے کے مالک اسلان خالد سکنہ ساگری کی درخواست پر مقدمہ درج کر کے زمیندار زرین کو گرفتار کر لیا۔
مدعی مقدمہ ارسلان خالد کا کہنا ہے کہ میرا گزر بسر اسی گائے سے ہوتا تھا، گائے کھیت میں جانے پر زمیندار نے سزا دی۔ علاقہ مکینوں نے مجھے بتایا کہ آپ کی گائے زخمی حالت میں ویران جگہ پر پڑی ہوئی ہے۔
پولیس کا کہنا ہے کہ گائے کا میڈیکل کروانے کے بعد ملزمان کے خلاف مقدمہ درج کر لیا ہے۔ گرفتار ملزم سے تفتیش کا عمل جاری ہے، باقی ملزمان کو بھی گرفتار کر لیں گے۔
