پنڈدادنخان: ڈسٹرکٹ پولیس آفیسر جہلم ناصر محمود باجوہ کا علاقہ تھانہ للِہ کے دیہات اتھر اور ٹوبہ کا دورہ، دونوں دیہات میں الگ الگ کھلی کچہری کا انعقاد کیا۔
ڈی ایس پی پنڈ دادنخان عامر شاہین گوندل اور سرکل پنڈ دادنخان کے ایس ایچ اوز تھانہ للِہ، پنڈ دادنخان اور جلالپور شریف بھی ہمراہ تھے۔
ڈی پی او جہلم نے دونوں دیہات کا تفصیلی دورہ کرتے ہوئے حالیہ ہونے والے ڈکیتی اور چوری کے مدعیان سے ملاقاتیں کیں،جائے واقعات کا معائنہ بھی کیا۔ دونوں دیہات میں منعقدہ کھلی کچہریوں میں اہل علاقہ کی کثیر تعداد شریک ہوئی۔
ڈی پی او جہلم نے ایس ڈی پی او پنڈ دادنخان اور سرکل کے ایس ایچ اوز کو زیرِ تفتیش مقدمات میں جلدازجلد ملزمان کو ٹریس کر کے گرفتار کرنے کی ہدایت کی اور کہا کہ مدعیان سے قریبی رابطہ رکھتے ہوئے ان کی بھر پور اشک شوئی یقینی بنائی جائے۔
انہوں نے کہا کہ اگر کسی بھی شخص کو مقامی پولیس کے رویہ یا تفتیش پر اعتراض ہو تو وہ براہ راست مجھ سے رابطہ کر سکتا ہے۔ حالیہ واقعات کی ٹریسنگ و ملزمان کی گرفتاری کے لیے سی آئی اے سٹاف،انویسٹی گیشن سٹاف،تھانہ جات کے ایس ایچ اوز معہ نفری اور آئی ٹی پر مشتمل ٹیمیں تشکیل دی گئی ہیں۔
ڈی پی او جہلم نے ٹوبہ،اتھر و ملحقہ دیہات کے لیے عارضی پولیس چوکی قائم کرنے اور علاقہ میں 24گھنٹے پولیس گشت کی تاکید کی۔
ڈسٹرکٹ پولیس آفیسر جہلم نے کہا کہ علاقہ میں ایلیٹ سیکٹر کی 24گھنٹے موجودگی یقینی بنائی جائے،نیز جرائم کے انسداد کے لیے سنیپ چیکنگ موثر کی جائے، ضلع بھر کی سی آئی اے کا عملہ پنڈ دادنخان میں ڈی ایس پی پنڈ دادنخان کی صوابدید پر ڈیوٹی سرانجام دے گا۔
ڈی پی او جہلم ناصر محمود باجوہ نے کہا کہ فری رجسٹریشن آف کرائم کی پالیسی پر عمل پیرا ہوتے ہوئے تمام مدعیان کی ایف آئی آرز کا اندراج ہر صورت یقینی بنایا جائے گا۔ شہریوں کے اثاثہ جات کی حفاظت،امن وامان کا قیام اور پر امن ماحول کی فراہمی جہلم پولیس کی اولین ترجیح ہے۔
