جہلم: تھانہ کالا گجراں پولیس نے چوری اور موٹر سائیکل چوری کی وارداتوں میں متحرک شاہ رخ گینگ کے 3 ملزمان کو گرفتار کرکے ان کے قبضہ سے چوری شدہ موٹر سائیکلیں اور دیگر قیمتی سامان برآمد کرلیا۔
ترجمان جہلم پولیس کے مطابق ایس ایچ او تھانہ کالا گجراں اور ٹیم نے کارروائی کرتے ہوئے شاہ رخ گینگ کے تین کارندوں کو گرفتار کیا۔ ملزمان کے قبضہ سے 6 چوری شدہ موٹر سائیکلیں، 2 لیپ ٹاپ، پی سی مانیٹر، ایل سی ڈی، 2 ڈیجیٹل کیمرے اور چارجرز برآمد کیے گئے۔
پولیس کے مطابق گرفتار ملزمان رش والی جگہوں پر ریکی کرتے تھے اور بغیر لاک کے کھڑی موٹر سائیکلوں کو نشانہ بنا کر چوری کرتے تھے۔ ملزمان سے مزید تفتیش جاری ہے، جس کے دوران مزید وارداتوں کے انکشافات متوقع ہیں۔
پولیس حکام کا کہنا ہے کہ گرفتار ملزمان کے خلاف ٹھوس شواہد اکٹھے کرکے انہیں چالان عدالت کیا جائے گا اور قانون کے مطابق قرار واقعی سزا دلوائی جائے گی۔
ڈی پی او جہلم شفیق احمد چوہدری نے کہا کہ جرائم پیشہ عناصر کے خلاف بلاامتیاز کارروائیاں جاری رکھی جائیں گی اور شہریوں کے جان و مال کے تحفظ کو ہر صورت یقینی بنایا جائے گا۔
