جہلم سے اغواء ہونے والی 18 سالہ ذہنی معذور لڑکی کو ایک گھر سے بازیاب کروا لیا گیا، پولیس نے ملزم کو گرفتار کر لیا۔
تفصیلات کے مطابق جہلم کے نواحی علاقے توکل پور پکھوال سے اغواء ہونے والی 18 سالہ ذہنی معذور لڑکی کو تھانہ صدر پولیس نے کامیاب کارروائی کرتے ہوئے کوٹلی چھتہ کے ایک گھر سے بازیاب کر لیا جبکہ ملزم کو گرفتار کر لیا گیا ہے۔
پولیس کے مطابق ملزم نے لڑکی کو ورغلا کر اغواء کیا اور اپنے گھر میں حبسِ بے جا میں رکھا ہوا تھا۔
متاثرہ لڑکی 6 اپریل کو گھر سے نکل کر لاپتہ ہو گئی تھی، جس کے بعد اس کی تلاش شروع کی گئی۔ تحقیقات کے دوران معلوم ہوا کہ ملزم نے لڑکی کو ورغلا کر اغواء کیا اور اپنے گھر میں لے گیا جہاں اسے زبردستی رکھا گیا۔
پولیس کا کہنا ہے کہ ملزم لڑکی سے مزدوری کرواتا تھا اور اسے مناسب خوراک بھی فراہم نہیں کرتا تھا۔ مزید انکشاف ہوا ہے کہ ملزم گھر میں اکیلا رہتا تھا اور مزدوری کے بعد لڑکی کو کمرے میں بند کر دیتا تھا۔
پولیس نے ہیومن ریسورس اور سیف سٹی کیمروں کی مدد سے جدید تفتیشی طریقہ کار استعمال کرتے ہوئے لڑکی کو تلاش کر کے بحفاظت بازیاب کروایا۔
پولیس حکام کے مطابق ابتدائی میڈیکل رپورٹ میں زیادتی کے شواہد بھی سامنے آئے ہیں جبکہ مزید تحقیقات کے لیے فرانزک نمونے لاہور بھجوا دیے گئے ہیں۔
پولیس نے ملزم کے خلاف مقدمہ درج کر کے مزید تفتیش کا آغاز کر دیا ہے۔
