جہلم: ڈی ایس پی ٹریفک پولیس خرم فیاض کی خصوصی دعوت پر ایس ایل ایس کالج کے ایم ڈی سرفراز ملک نے طلباء کے ہمراہ ٹریفک پولیس آفس کا مطالعاتی دورہ کیا۔ اس اہم دورے کا مقصد طلباء کو ٹریفک قوانین، ڈرائیونگ لائسنس کے اجراء اور شہری سہولیات کے عملی نظام سے آگاہی دینا تھا۔
دورے کا آغاز ٹریفک پولیس کے ڈرائیونگ اسکول سے ہوا جہاں انچارج ڈرائیونگ اسکول سب انسپکٹر ہارون رشید نے طلباء کو تفصیلی بریفنگ دی۔ انہوں نے ڈرائیونگ کورسز، لائسنس کے اجراء کے مراحل، اور عملی تربیت کے بارے میں معلومات فراہم کیں۔
اس کے بعد طلباء کو لائسنس ڈیپارٹمنٹ لے جایا گیا، جہاں انچارج لائسنس برانچ انسپکٹر عدنان نے ڈرائیونگ لائسنس کے پراسیس، سائن ٹیسٹ اور دیگر تقاضوں کے بارے میں تفصیلاً بتایا۔ طلباء نے لائسنس کے مرحلہ وار طریقہ کار کو قریب سے دیکھا اور سیکھا۔
آخر میں وفد نے خدمت مرکز کا دورہ کیا جہاں فاروق نے انہیں فراہم کی جانے والی سہولیات جیسے کہ پولیس کریکٹر سرٹیفکیٹ، لرنر لائسنس اور دیگر سروسز کے بارے میں آگاہ کیا۔ طلباء نے ان تمام مراحل میں بھرپور دلچسپی کا مظاہرہ کیا۔
یہ دورہ طلباء کے لیے نہایت معلوماتی اور تعلیمی تجربہ ثابت ہوا، جس سے انہیں مستقبل میں اپنی قانونی اور شہری ذمہ داریوں کو بہتر انداز میں نبھانے کی رہنمائی ملی۔ طلباء نے ایس ایل ایس اور ٹریفک پولیس آفس کا شکریہ ادا کیا۔
