جہلم: ڈپٹی کمشنر جہلم میر رضا اوزگن کی ہدایت پر پیرا انفورسمنٹ اسٹیشن جہلم میں نئی بھرتیوں کے لیے جسمانی آزمائشوں (فزیکل ٹیسٹ) کا باقاعدہ انعقاد کیا گیا۔ ان ٹیسٹ کی نگرانی ایڈیشنل ڈپٹی کمشنر جنرل شگفتہ جبین، اسسٹنٹ کمشنر جہلم عبدالسمیع شیخ اور اسسٹنٹ کمشنر ایچ آر نے ایس ڈی ای او شاہد ممتاز اور ڈی ایس پی شہباز ہنجرا کے ہمراہ کی۔
ایڈیشنل ڈپٹی کمشنر جنرل شگفتہ جبین نے جسمانی آزمائش کے تمام مراحل کا خود معائنہ کیا اور واضح ہدایات جاری کیں کہ بھرتی کے عمل میں شفافیت اور میرٹ کو ہر صورت مقدم رکھا جائے، تاکہ صرف اہل اور حق دار امیدواروں کا انتخاب یقینی بنایا جا سکے۔
ان جسمانی آزمائشوں میں مرد اور خواتین دونوں امیدواروں نے بھرپور شرکت کی، جہاں دوڑ سمیت دیگر مقررہ جسمانی معیارات کو جانچا گیا۔
اس موقع پر اسسٹنٹ کمشنر جہلم عبدالسمیع شیخ نے کہا کہ ضلعی انتظامیہ بھرتیوں کے تمام مراحل کو مکمل طور پر قابلیت اور اہلیت کی بنیاد پر یقینی بنا رہی ہے۔ انہوں نے امیدواروں کے نظم و ضبط کو سراہتے ہوئے واضح کیا کہ کسی بھی قسم کی سفارش یا دباؤ کو ہرگز برداشت نہیں کیا جائے گا۔
ایس ڈی ای او شاہد ممتاز نے بریفنگ دیتے ہوئے بتایا کہ بھرتی کے تمام مراحل کڑی نگرانی میں مکمل کیے جا رہے ہیں تاکہ کسی بھی امیدوار کے ساتھ ناانصافی نہ ہو۔ انہوں نے مزید کہا کہ رزقِ حلال کی تلاش میں نکلنے والے نوجوانوں کا حق انہیں ضرور دیا جائے گا۔
ایڈیشنل ڈپٹی کمشنر جنرل شگفتہ جبین نے جسمانی آزمائشوں کے کامیاب انعقاد پر ٹیم کی کارکردگی کو سراہا اور ڈی ایس پی شہباز ہنجرا کی جانب سے فراہم کردہ حفاظتی و انتظامی تعاون کی تعریف کی۔ ضلعی انتظامیہ جہلم نوجوانوں کو باعزت روزگار کی فراہمی کے لیے مسلسل کوشاں ہے۔
