جہلم: ڈپٹی کمشنر جہلم میثم عباس نے ستھرا پنجاب پروگرام کے تحت سول لائنز روڈ کا دورہ کیا اور صفائی کے انتظامات کا تفصیلی جائزہ لیا۔ اس موقع پر انہوں نے صفائی عملے سے ملاقات کی، ان کی کارکردگی کا مشاہدہ کیا اور سپروائزرز سے صفائی کے عمل کی موجودہ صورتحال پر بریفنگ لی۔
ڈپٹی کمشنر نے صفائی کے معیار کو مزید بہتر بنانے، کچرے کی بروقت تلفی اور نالوں کی مکمل صفائی کے لیے موثر اقدامات کرنے کی ہدایت دی۔ انہوں نے کہا کہ شہریوں کو صاف ستھرا اور صحت مند ماحول فراہم کرنا ضلعی انتظامیہ کی اولین ترجیح ہے اور اس مقصد کے لیے صفائی کے نظام کو مزید منظم اور موثر بنایا جائے گا۔
انہوں نے صفائی عملے کی کارکردگی کو سراہتے ہوئے ان کا حوصلہ بڑھایا اور ہدایت دی کہ شہر کی گلیوں، بازاروں اور عوامی مقامات پر صفائی کے تسلسل کو یقینی بنایا جائے۔ اس کے ساتھ ساتھ، سپروائزرز کو ہدایت کی گئی کہ صفائی کے عمل کی سخت نگرانی کریں اور روزانہ کی بنیاد پر فیلڈ میں موجود رہ کر صفائی عملے کی کارکردگی کو مانیٹر کریں۔
ڈپٹی کمشنر نے مزید کہا کہ ضلعی انتظامیہ "ستھرا پنجاب پروگرام” کے تحت صفائی کے تسلسل کو برقرار رکھنے کے لیے پرعزم ہے اور اس حوالے سے کسی بھی قسم کی غفلت برداشت نہیں کی جائے گی۔
انہوں نے شہریوں سے بھی اپیل کی کہ وہ صفائی کے عمل میں ضلعی انتظامیہ کا ساتھ دیں اور اپنے اردگرد کے ماحول کو صاف رکھنے میں کردار ادا کریں تاکہ جہلم کو ایک مثالی اور صاف ستھرا شہر بنایا جا سکے۔
